ސްޕޯޓްސް އެރީނާގެ ދަށުން އޭދަފުށީގައި އެޅި ފުޓްސަލު ދަނޑުގައި ބެހެއްޓި ލައިޓް ސިސްޓަމުން ދަނޑަށް ފުދޭވަރުގެ އަލިކަންނުލިބޭ މައްސަލަ ވަރަށް އަވަހަށް ހައްލުވާނެ ކަމަށާއި އާ ލައިޓް ސިސްޓަމް މިހާރު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ފަރާތުން ލިބިފައިވާ ކަމަށް އޭދަފުށީ ކައުންސިލުން ބުނެފި އެވެ.
ކައުންސިލުގެ ނައިބް ރައީސް މުހައްމަދު ނައުރީފް ވިދާޅުވީ ފުޓްސަލު ދަނޑުގައި ހުންނަން ޔޫތު މިނިސްޓްރީން ސްޕްސިފައިކޮށްފައިވާ ވައްތަރުގެ ލައިޓް ސިސްޓަމް އިއްޔެ ކައުންސިލަށް ލިބިފައިވާ ކަމަށާއި މިނިވަން 50 ގެ ހަރަކާތަތް ނިމުމާއެކު ލައިޓްތައް ހަރުކުރުމުގެ މަސައްކަތް ފަށާނެ ކަމަށެވެ.
އާ ލައިޓް ސިސްޓަމުގައި ހިމެނެނީ ހުދު އަލި ހުންނަ 1000 ވޯޓްގެ 12 ލައިޓެވެ. ދަނޑު ހުޅުވިއިރު ހަރުކޮށްފައި ހުރީ 500 ވޯޓްގެ ރަތް އަލި ހުންނަ 12 ލައިޓެވެ. އެ ލައިޓަތަކުން އެކަށީގެންވާ ވަރަށް އަލި ނުލިބޭތީ ފުޓްބޯޅަ ކުޅޭ ޒުވާނުން ޝަކުވާކުރާތާ އެތައް ދުވަހެއް ވެއްޖެ އެވެ.
ނައުރީފް ވިދާޅުވި ގޮތުގައި އާ ލައިޓް ސިސްޓަމް ހަރުކޮށް ދިއްލަން ފެށުމުން ޒުވާނުންގެ އެންމެބޮޑު ޝަކުވާއަކަށް ވެފައިވާ ފުޓްސަލް ދަނޑަށް ފުދޭވަރުގެ އަލިކަންނުލިބޭ މައްސަލަ ހައްލުވާނެ އެވެ.