ރެއަށް ވަނީ ފަސްކޮށްފައި– ފޮޓޯ / އަބޫ ޔައުލާ
މިނިވަން ކަމަށް 50 އަހަރު ފުރުން ފާހަގަ ކުރުމަށް ހިންގާ ހަރަކާތުގެ ދަށުން މާދަމާ ރޭ އޭދަފުށީގައި ބާއްވަން ހަމަޖެއްސި މިނިވަން 50ގެ ސްޓޭޖް ހަރަކާތްތައް އަންނަ ހުކުރު ދުވަހުގެ ރެއަށް ފަސްކޮށްފި އެވެ.
ސްޓޭޖް ހަރަކާތްތައް ފަސްކުރީ މާދަމާ ރޭ މާލޭގައި ބާއްވަން ހަމަޖެއްސި މިނިވަން 50ގެ ރަސްމީ ކުޅިވަރުތައް އަންނަ ހުކުރު ދުވަހުގެ ރެއަށް ފަސްކުރުމާ ގުޅިގެންނެވެ.
އޭދަފުށީ ކައުންސިލުން ބުނި ގޮތުގައި މިނިވަން 50 ފާހަގަ ކުރުމަށް އޭދަފުށީ ސްޓޭޖް ސަރަހައްދުގައި ބާއްވާ ސްޓޭޖް ހަރަކާތްތަކުގައި ދޮންފަނު ބޮޑު ބެރުގެ އިތުރުން ސްކޫލު ކުދިންނާއި ވަފާ ޖަމިއްޔާގެ އައިޓަމުތައް ހުށަހަޅައިދޭނެ އެވެ. އަދި މި ޝޯ ގެ ތެރެއިން ވަގުތު ކޮޅެއް މާލޭގައި ބާއްވާ ރަސްމީ ކުޅިވަރުތަކުގެ ތެރެއިން ޓީވީއެމުން ވަގުތުން ލައިވް ކުރާނެ ކަމަށްވެސް ރަށު ކައުންސިލުން ބުންޏެވެ.
މިނިވަން ދުވަހުގެ ހަރަކާތްތައް ފެށުމުގެ ގޮތުން މިނިވަން ދުވަހުގެ މުނާސަބަތުގައި ދިދަ ނެގުމުގެ ރަސްމިޔާތު ރޭ ބ. އަތޮޅު ކައުންސިލު އިދާރާގައި ވަނީ ބާއްވައިފަ އެވެ. އެ ރަސްމިޔާތުގައި ސަރުކާރު މުއައްސަސާތަކާއި އަމިއްލަ ކުންފުނިތަކުގެ އިސްވެރިންނާއި ބައެއް މުވައްޒަފުން ބައިވެރިވި އެވެ.
މީގެ އިތުރުން މިނިވަން 50 ފާހަގަ ކުރުމަށް އޭދަފުށީގައި ބާއްވާ ހިނގާލުން މިއަދު ހަވީރު 4:15 ގައި ރަސްމީ ފާލަން ކައިރިން ފަށާނެ އެވެ. ހިނގާލުގެ ތެރެއިން ނާއި ހިނގާލުން ނިންމާލުމުގެ ގޮތުން ސަގާފީ ކުޅިވަރުތަކެއް ކުރިއަށްދާނެ އެވެ.
އޭދަފުށީގެ މުޅި ބަނދަރު މައްޗާއި ސަރުކާރު އަދި ކުންފުނިތަކުގެ އިމާރާތްތައް ވަނީ މިނިވަން 50 ފާހަގަކުރުމުގެ ގޮތުން ކުލަ ބޮކިން ދިއްލާއަޅާފަ އެވެ.
