މިނިވަން 50ގެ ފޯރި ގަދަވެ، ހަރަކާތްތައް އިތުރުކޮށްފި

މިނިވަން ކަމަށް 50 އަހަރު ފުރުން ފާހަގަ ކުރުމަށް އޭދަފުށީގައި ހިންގާ ހަރަކާތްތަކުގެ ފޯރި ގަދަވެ، އިތުރު ހަރަކާތްތަކެއް މި ހަފްތާ ބަންދުގެ ނިޔަލަށް ކުރިއަަށް ގެންދަން ނިންމައިފި އެވެ.

މިނިވަން 50 ސްޓިއަރީން ކޮމެޓީން ރޭ ބުނީ މިނިވަން 50 ފާހަގަ ކުރުމަށް އޭދަފުށީ ރައްޔިތުންގެ ފަރާތުން ވަރަށް ބޮޑު ތަރުހީބެއް ލިބެމުން އަންނަ ކަމަށާއި އަންނަ ހުކުރު ދުވަހުގެ ނިޔަލަށް ކޮންމެ ދުވަހަކުވެސް ޚާއްސަ ހަރަކާތެއް މިރަށުގައި ކުރިއަށްދާނެ ކަމަށެވެ.

އެގޮތުން މިއަދު ހަވީރު ހާއްސަ ސައިކަލު ބުރެއް ބޭއްވުމަށްވަނީ ހަމަޖެހިފަ އެވެ. އަދި މާދަމާ ހަވީރު “ކުޑަކުދިންގެ ހަވީރެއްވެސް ބޭއްވުމަށް ދަނީ ތައްޔާރުވަމުންނެވެ. މީގެ އިތުރުން މިނިވަން 50 ގެ ޚާއްސަ ސްޓޭޖް ހަރަކާތްތައް އަންނަ ހުކުރު ދުވަހުގެރޭ އޭދަފުށީ ރަސްމީ ސްޓޭޖުގައި އޮންނާނެ އެވެ. ސްޓޭޖު ހަރަކާތަތަކުގައި ސްކޫލު ކުދިންގެ އައިޓަމުތައްވެސް ކުރިއަށްދާނެ ކަމަށް ސްޓީއަރީން ކޮމެޓީން ބުންޏެވެ.

މިނިވަން 50 ފާހަގަކުރުމަށް އޭދަފުށީގައި 26 ވަނަ ދުވަހު ހަވީރު ވަނީ ބޮޑު ހިނގާލުމެއްވެސް ބާއްވައިފަ އެވެ. ގިނަ އަދަދެއްގެ އާއްމުން ބައިވެރިވި މި ހިނގާލުން ނިންމާލުމުގެ ގޮތުން ސަގާފީ ކުޅިވަރު ހަރަކާތްތަކެއްވެސް އެދުވަހު ހަވީރުވަނީ ބާއްވައިފަ އެވެ. އަދި ރޭ ވަނީ އޭދަފުށީ ރައްޔިތުންނަށް ޚާއްސަ މިއުޒިކު ޝޯ އެއްވެސް ބާއްވައިފަ އެވެ.

މިނިވަން ފަންސާހަށް އޭދަފުށީ ވަނީ ވަރަށް ބޮޑަށް ޒީނަތްތެރިކޮށްފަ އެވެ. މިނިވަން 50 އަށް އޭދަފުށީ ޒީނަތްތެރި ކުރުމުގައި ސަރުކާރުގެ މުއައްސަސާތަކާއި، ކުންފުނިތަކާއި ޖަމިއްޔާ ތަކުގެ އިތުރުން އާއްމުންގެ މެދުގައިވެސް ބޮޑު ވާދަވެރިކަމެއް އުފެދިފައިވާކަން ފާހަގަކޮށްލެވެ އެވެ. ކުދިބޮޑު އެންމެން މި މަސައްކަތުގައި ޝާމިލުވެގެން އުޅޭއިރު، އޭދަފުށީގެ ބަނދަރު ސަރަހައްދަށް ބަލާލުމުން މިނިވަންކަމުގެ އުފާ ފާހަގަކުރަމުންދާ މަންޒަރު ސިފަވެގެންދެ އެވެ.

އެކި ކަހަލަ ޑިޒައިންތަކަށް ޤައުމީ ކުލަތަކުން ސަރުކާރުގެ އިމާރާތްތަކާއި، ބޮޑެތި ކުންފުނިތަކުގެ އިތުރުން، ސަރުކާރު އިމާރާތްތަކާއި މުޅި ބަދަރު މަތީ ވަނީ ދިއްލާލާފައެވެ. މިނިވަން ފަންސާހާއި ގުޅިގެން މާލެ އެކޭ އެއްގޮތަށް މިރަށަށްވެސް މިވަނީ ކުލަކުލައިގެ ބޮކިތަކުން އީދެއް އައިސްފައެވެ.