ވޮލީބޯޅަ އެސޯސިއޭޝަންގެ މައިލޯ އިންޓަ ސްކޫލް ވޮލީ ބޯޅަ މުބާރާތުގައި ބައިވެރިވި ތިން އުމުރު ފުރާއިންވެސް ޗެމްޕިއަންކަން ހޯދައި މުބާރާތުގެ ތާރީޚްގައި ރެކޯޑެއް ހޯދި ބ. ގޮއިދޫ ސްކޫލުގެ ވޮލީ ޓީމު އިއްޔެ އެނބުރި ރަށަށް އައުމުން ރަތް ދޫލައިގެ ހޫނު މަރުހަބާއެއް ކިޔައިފި އެވެ.
ވޮލީ ޓީމުގެ ދަރިވަރުންނާއި އޮފިޝަލުން އިއްޔެ ހެނދުނު ރަށަށް އައިސް ފޭބުމާ އެކު ރަށުގެ ބަނދަރު ސަރަހައްދުން މަރުހަބާ ކިޔުމަށް އެރަށުގެ އެންމެން ކަހަލަ ގޮތަކަށް ބައިވެރިވި އެވެ.
އެއަށް ފަހު އިއްޔެ ހަވީރު ރަށު ތެރޭގައި ވެހިކަލު ބުރެއް ވަނީ ބާއްވާފަ އެވެ. އަދި ވެހިކަލު ބުރަށްފަހު ގޮއިދޫ ސްކޫލް ވޮލީ ޓީމު ހޯދި ކާމިޔާބީ ފަހާގަކުރުމަށް ހާއްސަ ހަފްލާއެއްވެސް ވަނީ ބާއްވައިފަ އެވެ.
މިމުބާރާތުގެ 14 އަހަރުން ދަށުގެ ފިރިހެން ޑިވިޝަންގެ ޗެމްޕިއަންކަމާއި އެ އުމުރު ފުރައިގެ އަންހެން ޑިވިޝަންގެ ޗެމްޕިއަން ކަން ހޯދައި 16 އަހަރުން ދަށުގެ އަންހެން ޑިވިޝަން މުބާރާތް ކާމިޔާބުކޮށް ގޮއިދޫ ސްކޫލުން ރެކޯޑް ހެދީ މިހާތަނަށް އިންޓަ ސްކޫލްގެ ތާރީޚްގައި ތިން ކެޓަގަރީއަކުން މުބާރާތް ކާމިޔާބު ކުރި ސްކޫލްގެ ޝަރަފު ހޯދައިގެންނެވެ.
