ގޮއިދޫ އިންޓަރ އޮފީސް ފުޓްސަލް މުބާރާތް ފަށައިފި ބ. ގޮއިދޫގައި ހުންނަ ސަރުކާރު އޮފީސް/ކުންފުނިތަކުގެ މެދުގައި ބާއްވާ ޒޫމް ޑީލްސް އިންޓަރ އޮފީސް ފުޓްސަލް ޓޯނަމެންޓް ރޭ ފަށައިފި އެވެ.
މި މުބާރާތަކީ ފާއިތުވި އަހަރުތަކެކޭވެސް އެއްފަދައިން ގޮއިދޫގެ މުއައްސަސާތަކުގެ މެދުގައި އޮންނަ ގުޅުން ބަދަހިކޮށް، މުވައްޒަފުންގެ މެދުގައި ކުޅިވަރުގެ ރޫޙް އާލާކޮށް އެކުވެރިކަން ގާއިމުކުރުމަށްޓަކައި ބޭއްވޭ މުބާރާތެކެވެ.
މުބާރާތް ފެށުމުގެ ގޮތުން ރޭ ކުޅުނު ފުރަތަމަ މެޗުގައި ރަށު ކައުންސިލާ ބައްދަލުކޮށް ގޮއިދޫ ސްކޫލް މޮޅުވީ 10-2 އިންނެވެ. މި މެޗުގެ މޮޅު ކުޅުންތެރިޔާއަށް ހޮވުނީ ސްކޫލް ޓީމުގެ އަލީ ޖަޒްލާން އެވެ.
ރޭ ކުޅުނު ދެވަނަ މެޗުގައި އެމްޑަބްލިއުއެސްސީ ގެ މައްޗަށް ފެނަކަ ކުރި ހޯދީ 5-3 އިންނެވެ. މި މެޗުގެ މޮޅު ކުޅުންތެރިޔާގެ މަގާމު ލިބުނީ ފެނަކައިގެ ޝަމްއޫން ޖަލީލަށެވެ. ހަތަރު ދުވަހުގެ މުއްދަތަށް ކުރިއަށް ގެންދާ މި މުބާރާތުގައި ޖުމްލަ ހަތަރު ޓީމް ބައިވެރިވެފައިވާއިރު، މިއަހަރުގެ މުބާރާތް އިންތިޒާމު ކުރަނީ ގޮއިދޫ ސްކޫލުންނެވެ.
މި މުބާރާތުގެ އޮންލައިން މިޑިޔާ ޕާޓްނަރަކީ އީޓީ އެވެ.