ބ. އޭދަފުށީގައި ކުރިއަށް ގެންދިޔަ އޭދަފުށީ ކައުންސިލުގެ މިއަހަރުގެ ޤުރުއާން މުބާރާތުން އެއްވަނަ އަނާލް އަޙްމަދު ބިލާލު ހޯދައިފި އެވެ.
ބ. އަތޮޅު ތައުލީމީ މަރުކަޒުގެ ގްރޭޑް ފަހެއްގައި ކިޔަވަމުން އަންނަ އަނާލް ވަނީ މި މުބާރާތުގެ ބަލައިގެން ކިޔެވުމުގެ ބައިންވެސް އެއްވަނަ ހޯދައިފައެވެ.
އޭދަފުށީ ކައުންސިލުން އިންތިޒާމުކޮށްގެން މި މަހުގެ 1-2 އަށް ބޭއްވި ގުރުއާން މުބާރާތުގައި ހަ އުމުރުފުރައަކުން ޖުމްލަ 164 ދަރިވަރުން ވާދަކޮށްފައިވާ އިރު، މުބާރާތުން ދެވަނަ ހޯދާފައި ވަނީ އަމްނާއު އަޙުމަދު ޝާހިދު އެވެ. ތިންވަނަ ހޯދީ ޝައިމާ ޢަބްދުﷲ އެވެ.
މި މުބާރާތުން ވަނަތައް ހޯދި ދަރިވަރުންނަށް އިނާމު ދިނުމަށް މިއަދު ހަވީރު ހާއްސަ ހަފުލާއެއް ވަނީ ބާއްވާފައި ވެ އެވެ. މުޅި މުބާރާތުން އެއްވަނަ އަދި ދެވަނައިގެ އިތުރުން، އެކި އުމުރުފުރާތަކުން އެހެން ވަނަތަކަށް ހޮވުނު ކުދިންނަށް ވެސް ޓްރޮފީ އާއި ހަނދާނީ ލިޔުން ދީފައިވެ އެވެ.
މި މުބާރާތަކީ ރަށު ކައުންސިލުން ބުނި ގޮތުގައި މިއަހަރުގެ ގުރުއާން ކިޔެވުމުގެ ގައުމީ މުބާރާތަށް ދަރިވަރުން ހޮވުމަށްޓަކައި ބާއްވާ އަތޮޅު މުބާރާތުގައި ތަމްސީލުކުރާނެ ދަރިވަރުން ހޮވުމަށް ބޭއްވި މުބާރާތެކެވެ.
މި އަހަރުގެ މުބާރާތުގެ ފަނޑިޔާރުކަން ކުރީ އަލްގާރީ އަހުމަދު ތައުފީގާއި ގާރީ ޢަބްދުލް ޖަލީލް އިސްމާއިލްގެ އިތުރުން ގާރީ އިބްރާހީމް ޝަރީފް އެވެ.