ރޯދަ މަހާ ދިމާކޮށް ކޮންމެ ގޭބީސީއަކަށް 10 ކިލޯ ހަނޑުލާއި، 10 ކިލޯ ފުށް ސަރުކާރުން ހިލޭ ބަހަން ނިންމައިފައިވާ ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
ރައީސް ވިދާޅުވި ގޮތުގައި އަންނަ އަހަރު އެ އަދަދު އެއަށް ވުރެ ވެސް އިތުރު ކުރައްވާނެ އެވެ.
މިހާރު ރާއްޖެއަށް ކާޑުގެ ބާވަތްތައް ގެންނަނީ އިންޑިއާއިންނެވެ. ރާއްޖެއާއި އިންޑިއާއާ ދެމެދުގެ ގުޅުން ވަރަށް ބޮޑަށް ހީނަރުވެފައިވާ މިދަނޑިވަޅުގައި ރައީސް ވިދާޅުވީ, ހަޑުލާއި ހަކުރާއި ފުއް ހޯދުމަށް ތުރުކީއާ އެކު އެއްބަސްވުމެއް ހަދާފައިވާ ކަމަށެވެ.
އެގޮތުން، ތުރުކީއާ އެކު މިހާރު އެއްބަސްވެ، ފުރަތަމަ ޝިޕްމަންޓަށް އޯޑަރު ދީފައިވާނެ ކަމަށް ރައީސް ވިދާޅުވިއެވެ.
“އަދި ދަންނަވަންތޯ ލިބޭގޮތަށް ހަމައެކަނި ހަމަޖެއްސީއެއް ނޫން. މި ރޯދަ މަހު ފުރަތަމަ ފަހަރަށް ކޮންމެ ގޭބީސީއަކަށް ހިލޭ ދިވެހި ސަރުކާރުގެ ފަރާތުން 10 ކިލޯގެ ހަނޑޫ ބަސްތާއަކައި 10 ކިލޯގެ ފުށް ބަސްތާއެއް ހަދިޔާކުރާނަން،” އެ މަނިކުފާނު ވިދާޅުވިއެވެ.
“އަޅުގަނޑުމެން އަމިއްލަ ފައި މައްޗަށް ތެދުވާނީ އިރާދަކުރެއްވިއްޔާ އެއްވެސް ގައުމަކަށް ބަރޯސާވުން ނިމުމަކަށް ގެނެސް،” ރައީސް ވިދާޅުވިއެވެ.
މީގެ އިތުރުން، ރާއްޖެ އެތެރެކުރާ ބޭސް ވެސް ޔޫރަޕުންނާއި އެމެރިކާއިން އެތެރެކުރަން މަސައްކަތްކުރަމުން އަންނަ ކަމަށްވެސް ރައީސް ވިދާޅުވި އެވެ.
