ބ. އަތޮޅުގެ އެކި ރަށްރަށުގެ ކްލަބް ޖަމިއްޔާތަކާއި ކައުންސިލުތަކުން ރަށު ފެންވަރުގައި ބާއްވާ ކުޅިވަރު މުބާރާތްތަކަށް އަތޮޅު ކައުންސިލުން ދެމުން އައި ފައިސާގެ އެހީ ދިނުން ހުއްޓާލުމަށް ބ. އަތޮޅު ކައުންސިލުން ނިންމައިފި އެވެ.
ބ. އަތޮޅު ކައުންސިލުން މިގޮތަށް ނިންމީ މިމަހު 11 ވަނަ ބޭއްވި އެ ކައުންސިލްގެ މިދައުރުގެ ތިންވަނަ އާންމު ބައްދަލުވުމުގަ އެވެ.
އަތޮޅު ކައުންސިލުން ބުނި ގޮތުގައި މިއަތޮޅުގެ ރަށްރަށުގައި ރަށު ފެންވަރުގައި ބާއްވާ ކުޅިވަރު މުބާރާތްތަކަށް އެހީ ނުދޭން ނިންމީ އެ ކައުންސިލަށް އާމުދަނީ ލިބުމުގައި ދަތިތަކެއް ކުރިމަތިވެފައިވާތީ އެވެ.
ނަމަވެސް ރަށްރަށުގެ އިޖުތިމާއީ އަދި ތައުލީމީ ކަންތައްތަކަށް ކުރިއެކޭ އެއްގޮތަށް އަތޮޅު ކައުންސިލުގެ އެހީތެރިކަން ލިބޭނެ ކަމަށް އެ ކައުންސިލުން ބުންޏެވެ.
ރަށު ފެންވަރުގައި ބާއްވާ މުބާރާތްތަކަށް އަތޮޅު ކައުންސިލުން އެހީ ނުދޭން ނިންމިއިރު މިދިޔަ އަހަރު އަތޮޅު ކައުންސިލުން އެންމެ ގިނަ އަދަދެއްގެ ފައިސާ ދޫކޮށްފައިވަނީ ކުޅިވަރު ހަރަކާތްތަކަށެވެ. އެގޮތުން ތަފާތު އެކި ކުޅިވަރު މުބާރާތްތައް ބޭއްވުމަށާއި އަދި އެ މުބާރާތްތަކުގައި ބައިވެރިވާ ޓީމުތަކަށް ކައުންސިލުގެ ފަރާތުން 2016 ވަނަ އަހަރު ވަނީ، -/74585 ރ. އެހީގެ ގޮތުގައި ދީފައިވެ އެވެ.
