އިންޑިއާ އަތުން މޮޅުވެ ސަރަހައްދުގެ ޗެމްޕިއަންކަން ރާއްޖޭން ހޯދިތާ 10 އަހަރު ފަހުން އަނެއްކާވެސް އިންޑިއާގެ މައްޗަށް 2-1 އިން ކުރި ހޯދައި ސާފް ސުޒުކީ ކަޕުގެ ތަށި ލިބުމުން އޭދަފުށީގައި އުފާ ފާޅުކުރަމުން އެބަގެންދެއެވެ.
މެޗު ނިމުމާއެކު އުފާ ފާޅުކުރުމަށް ބޭއްވި ވެހިކަލް ބުރުގައި ގިނަ އަދަދެއްގެ ޒުވާނުން ލަވަޖަހައި ނަށާ ހަދާފައިވެ އެވެ.
އުފާފާޅުކުރަމުްނދިޔަ ޒުވާނަކު ބުނީ މިއީ މުޅި ރާއްޖެއަށް އުފާވެރިކަން ގެނެސްދިން ރެއެއް ކަމަށާއި މި ކާމިޔާބީ އޭދަފުއްޓަށް ވަކިން ޚާއްސަ ކަމަށެވެ.
“ވަރަށް ވަރަށް އުފާވެއްޖެ. އެންމެ ބޮޑު އުފަލެއްވަނީ މިފަހަރުވެސް ރާއްޖެއަށް ތަށި ލިބުމުގައި އޭދަފުށީ ދަރިންގެ ހިއްސާ ހިމެނޭތީ، ސެންޓޭ އާއި ހަމްޕު އަކީ ހީރޯ އިން،”
ގްރޫޕް ސްޓޭޖުގައި ރާއްޖެ އަތުން 2-0 އިން މޮޅުވި އިންޑިއާގެ މައްޗަށް ރާއްޖޭން މެޗުގެ ކުރީކޮޅު ލީޑު ނެގި އެވެ. މި ލަނޑު 19 ވަނަ މިނެޓުގައި ޖެހީ ނާއިޒް ހަސަން (ދާދު) ދިން ބޯޅައަކުން އިބްރާހިމް މަހުދީ ހަސަން (ފޭދޫ އިއްބެ) އެވެ.
އޭގެ ފަހުން އިންޑިއާގެ އެޓޭކްތައް ހުއްޓުވުމުގައި ރާއްޖޭން ވަނީ ވަރުގަދަ ދިފާއީ ކުޅުމެއް ދައްކައިފަ އެވެ.
ރާއްޖޭގެ ދެ ވަނަ ގޯލް ފަހު ހާފުގައި ކައުންޓާ އެޓޭކެއްގައި ޖެހީ އަލީ ފާސިރު (ސެންޓޭ) އެވެ. ހަމްޕު ދިން ބޯޅަ އަށް މުޅިން ހުހަށް އަރައި ސެންޓޭ މި ގޯލް ޖެހީ ކުރިއަށް އެރި އިންޑިއާ ކީޕަރަށް އެއްވެސް ފުރުސަތު ނުދީއެވެ.
މެޗުގެ ފަހު ސިކުންތުކޮޅުގެ ތެރޭގައި އިންޑިއާ އިން ގޯލެއް ޖެހި ނަމަވެސް ނަތީޖާ ބަދަލުކުރެވޭ ގޮތެއް ނުވި އެވެ.
