ބ. އޭދަފުށީގައި އަލަށް ތަރައްޤީކުރި ޒަމާނީ ފެރީ ޓާމިނަލް “އޭދަފުށި ގިމަތަ” މިއަދު ރަސްމީކޮށް ހުޅުވައިފިއެވެ.
މި ޓާމިނަލް ރަސްމީކޮށް ހުޅުވައިދެއްވީ މެންދުރުފަހު ބޭއްވުނު ރަސްމިއްޔާތެއްގައި އޭދަފުށީ ދާއިރާގެ މަޖިލިސް މެންބަރު އަޙްމަދު ސަލީމެވެ.
މި ޓާމިނަލަކީ ރާއްޖޭގެ އެހެން ރަށްރަށުގައި ހުރި ފެރީ ޓާމިނަލްތަކާ ތަފާތު، ޒަމާނީ ވަސީލަތްތަކާއެކު ފަރުމާކޮށްފައިވާ ތަނެކެވެ. ދެ ބުރީގެ މި އިމާރާތުގެ ތިރީ ބައިގައި އޮފީސް ބައިގެ އިތުރުން، ދަތުރުވެރިންނަށް ޚާއްޞަކުރެވިފައިވާ މަޑުކޮށްލާ ސަރަހައްދަކާއި ވިޔަފާރި ކުރުމަށް ޚާއްޞަކުރެވިފައިވާ ފިހާރަތައް ހިމެނެއެވެ.
އަދި ދަތުރުވެރިންގެ ފަސޭހައަށް ދެ ފާޚާނާގެ އިތުރުން ޅަދަރިމައިންނަށް ބޭނުންވާ ޚާއްޞަ ޚިދުމަތްތައްވެސް މި ޓާމިނަލުން ލިބެން ހުންނާނެ ކަމަށް ކައުންސިލުން މަޢުލޫމާތު ދެއެވެ.
މީގެއިތުރުން، ޓާމިނަލްގެ މަތީ ބައިގައި ވިޔަފާރި އުސޫލުން ކުއްޔަށް ދޫކުރާ ރެސްޓޯރަންޓްތަކާއި ކެފޭތައް ހިމެނޭއިރު، މިހާރުވެސް މި ތަންތަނުގެ ބައެއް ސަރަހައްދުތައް ވަނީ ކުއްޔަށް ދޫކޮށްފައެވެ.
“އޭދަފުށި ގިމަތަ” ގެ ބޭރު ސަރަހައްދުގައި ރީތިކޮށް އިންދާފައިވާ ކަދުރު ރުއްތަކާއި، ފިނިވައިޖެހޭގޮތަށް ފަރުމާކޮށްފައިވާ މަޑުކޮށްލާ ސަރަހައްދުތަކަކީ މި ޓާމިނަލްގެ ޚާއްޞަ ސިފައެއްގެ ގޮތުގައި ފާހަގަކުރެވެއެވެ.
Hithaadhoo dhaairaa membaru thithaa konkamakaa messeh hen enburenee