ބ. ކަމަދޫގައި ހިންގާ ގެސްޓުހައުސްއެއް ކަމުގައިވާ ކަމަދޫ އިން އާއި ސޮނެވާ ނަމޫނާ ގުޅިގެން، އެ ގެސްޓުހައުސްގައި އުފެދޭ ކާބޯތަކެތީގެ ކުނި ދެމެހެއްޓެނިވި ގޮތެއްގައި މެނޭޖްކުރުމުގެ މަސައްކަތް ފަށައިފި އެވެ.
މިއީ މީހުން ދިރިއުޅޭ ރަށްރަށުގައި ފަތުރުވެރިކަމާ ގުޅުންހުރި ވިޔަފާރިތަކުން އުފައްދާ ކުނި މެނޭޖްކުރުމަށް އެޅޭ މުހިއްމު ފިޔަވަޅެއް ކަމަށް ސޮނެވާ ނަމޫނާއިން ބުނެ އެވެ.
މި މަސައްކަތުގެ ސަބަބުން ގެސްޓުހައުސްތަކުން އުފެދޭ ކުނީގެ އަދަދު މަދުވެ ވޭސްޓް މެނޭޖްމަންޓް ސިސްޓަމަށް ފަސޭހަވާނެ ކަމަށް ވެސް އެ ކުންފުނިން ފާހަގަކުރެ އެވެ.
މި މަސައްކަތުގައި ބޭނުންކުރަނީ އަގުހެޔޮ އަދި ފަސޭހަކަމާއެކު ބޭނުންކުރެވޭ ‘ޓަކަކޫރާ މެތަޑު’ އެވެ. މިއީ ކާބޯތަކެތީގެ ކުނި އޭގެ ޒާތުގައި ކޮމްޕޯސްޓަށް ވަރަށް ފަސޭހަކަމާއެކު ބަދަލުކޮށްލާ މެތަޑެކެވެ. ސޮނެވާ ނަމޫނާގެ އަމާޒަކީ ކުރިއަށް އޮތް ހަ މަސް ދުވަހުގެ ތެރޭގައި ކަމަދޫ އިން އިން އުފެދޭ ބަދިގެ ކުނި އެތަނުގައި ޒިންމާދާރުކަމާއެކު މެނޭޖްކޮށް، އުކާލަން ޖެހޭ ކުނީގެ މިންވަރު މަދުކުރުމެވެ.
ސޮނެވާ ނަމޫނާއިން ވަނީ މި މެތަޑު މީހުން ދިރިއުޅޭ އެހެން ރަށްރަށުގައި ކާމިޔާބުކަމާއެކު ބޭނުންކޮށްފަ އެވެ. އެގޮތުން ‘ކާދު ސަތޭކަ’ ޕްރޮގްރާމްގެ ދަށުން ބ. އަތޮޅުގެ ކިހާދޫ، ކެންދޫ، ކުޑަރިކިލު، ދޮންފަނު އަދި ނ. ކުޑަފަރީގައި މި މަސައްކަތް ހިންގާފައިވެ އެވެ. މި މަސައްކަތް ތައާރަފްކުރެވުނު ރަށްރަށުގައި އުކާލަންޖެހޭ ބަދިގޭ ކުނީގެ ނިސްބަތް 30 އިންސައްތައިން ކުޑަކުރެވިފައިވާ ކަމަށް ސޮނެވާ ނަމޫނާއިން ފާހަގަކުރެ އެވެ.
ސޮނެވާ ނަމޫނާއިން ބުނީ، ކަމަދޫ އިން އާއެކު ފަށާފައިވާ މި މަސައްކަތުގެ ނަތީޖާއަށް ބަލައި، އިތުރު ގެސްޓުހައުސްތަކަށް ވެސް މި ޕްރޮގްރާމް ފުޅާކުރެވޭނެ ކަމަށެވެ. “މި މަސައްކަތްތަކުގެ ނަތީޖާތަކަށް ބަލައި، މިހާރު ގެސްޓުހައުސްތަކާއެކު މި ފަށާ މަސައްކަތަކީ ރަށު ފެންވަރުގައި ގެސްޓުހައުސްތަކުން އުފެދޭ ކުނީގެ މައްސަލަ ހައްލުކުރުމަށް އެޅޭ މުހިއްމު ފިޔަވަޅެއް،” ސޮނެވާ ނަމޫނާއިން ބުންޏެވެ.
