ސްރީ ލަންކާއަށް އެރި ތޫފާނުގައި ލިބުނު ގެއްލުންތަކުން އަރައިގަތުމުގައި ދިވެހިންގެ ފަރާތުން އެހީވުމަށް ކުރިއަށްގެންދާ “ސިލޯނާ އެކު ދިވެހިން” ޓެލެތޯން މިއަދު ފަށައިފި އެވެ.
މި ޓެލެތޯން އަކީ ޕީއެސްއެމްއިން ރާއްޖޭގެ މީޑިއާތަކާ ގުޅިގެން ހިންގާ ހަރަކާތެކެވެ. މިއަދު ހެނދުނު 9:00 ގައި ފެށި މި ޓެލެތޯން މިރޭ މެންދަމު 1:00 ގެ ނިޔަލަށް ކުރިއަށް ގެންދިއުމަށް ވަނީ ހަމަޖެހިފަ އެވެ.
މި ހެޔޮކަމުގެ ހަރަކާތުގައި ޖުމްލަ 26 މީޑިއާއެއް ބައިވެރިވެ އެވެ. ލަންކާއަށް ގެއްލުންދިން ތޫފާނު ދީތުވާގެ ސަބަބުން ފެން ބޮޑުވުމާއި ބިންގަނޑު ކަނޑައިގެން ދިއުން ފަދަ އެކި ހާދިސާތަކުގައި ލަންކާއިން މަރުވި މީހުންގެ އަދަދު މިހާރު ވަނީ 159 އަށް އަރައިފަ އެވެ. ހާލަތު ގޯސްވުމާ ގުޅިގެން އިއްޔެ ލަންކާގައި ކުއްލި ނުރައްކަލުގެ ހާލަތު ވެސް ވަނީ އިއުލާނުކޮށްފަ އެވެ.
ޓެލެތޯނަށް ފައިސާ ހަދިޔާކުރުމުގެ އިންތިޒާމުތައް ވަނީ ފަސޭހަކޮށްފަ އެވެ. މާލެ، ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ބަހައްޓާފައިވާއިރު، ޓްރާންސްފާ އަދި ބޭންކް ޗެކް މެދުވެރިކޮށް ވެސް ފައިސާ ޖަމާކުރެވޭނެ އެވެ.
ދިވެހި ރުފިޔާއިން ނަމަ ޖަމާކުރާނީ 7730000796107 އެކައުންޓަށެވެ. އަދި ޑޮލަރުން ނަމަ ޖަމާކުރާނީ 7730000796106 އަށެވެ.
ޕީއެސްއެމްއިން މި ޓެލެތޯން ބާއްވަން ނިންމީ ލަންކާ އަކީ ޒަމާނުއްސުރެ ދިވެހިންނާ އެންމެ ގާތް ގުޅުން އޮންނަ، އަދި އެންމެ ކައިރީގައި އޮތް އަވައްޓެރި ގައުމު ކަމަށް ވާތީ ދިވެހިންގެ ފަރާތުން ދެވެން އޮތް އެހީތެރިކަމެއް ދިނުމުގެ ގޮތުންނެވެ. މީގެ އިތުރުން ސަރުކާރުގެ ފަރާތުން ވެސް ވަނީ ލަންކާއަށް އެހީތެރިކަން ފޯރުކޮށްދިނުމަށް ނިންމާފަ އެވެ. އެގޮތުން، 50،000 ޑޮލަރާއި 25،000 ކޭސް މަސްދަޅު ހަދިޔާ ކުރަން ދިވެހި ސަރުކާރުން ވަނީ މިހާރު ނިންމައިފަ އެވެ.
ލަންކާއަށް ވިއްސާރަކުރާތާ ހަފްތާއެއް ފަހުން އެރި މި ތޫފާނާ އެކު ބޮޑެތި ގެއްލުންތަކެއް ލިބިފައިވާއިރު، ތޫފާނު މިހާރު ވަނީ ލަންކާއާ ދުރަށްޖެހި އިންޑިއާގެ ޓެމިލްނާޑޫއާ ކައިރިވެފަ އެވެ. ތޫފާނުގެ ސަބަބުން ވައި ގަދަވެ ބޯކޮށް ވާރޭ ވެހޭނެ ކަމަށް ލަފާކޮށް އިންޑިއާގެ އެކި ސަރަހައްދުތަކުން ވެސް ވަނީ ތައްޔާރީ ހާލަތަށް އައިސްފަ އެވެ. ދިވެހި ރައްޔިތުންގެ މި ޓެލެތޯން މެދުވެރިކޮށް ލިބޭ އެހީތެރިކަމަކީ ލަންކާގެ ރައްޔިތުންނަށް މި ދަތި ދަނޑިވަޅުގައި ލިބޭނެ ވަރަށް ބޮޑު ހިތްވަރެކެވެ.
