ބ. އޭދަފުއްޓަށް ވަރަށް ގިނަ ދުވަހު ތަފާތު އެކި ރޮނގުތަކުން ވަރަށް ގިނަ ޚިދުމަތް ކުރައްވާފައިވާ މިރަށު ޑޭޒީވިލާ، މުހައްމަދު އަލީ މިއަދު ނިޔާވެއްޖެ އެވެ.
އުމުރުން 91 އަހަރުގައި މުހައްމަދު އަލީ ނިޔާވެފައިވަނީ އިންޑިޔާގެ ޗެންނާއީގައި ސިއްހީ ފަރުވާ ހޯދަމުން ދަނިކޮށް މިއަދު މެންދުރު ފަހު އެވެ.
މުހައްމަދު އަލީ އަކީ އޭދަފުށީގައި ވަރަށް ފުޅާކޮށް ކުރިން ވިޔަފާރި ކުރެއްވި އަދި މިރަށުގެ ގިނަ ބައެއްގެ ލޯބި ހޯއްދަވާފައިވާ އޭދަފުށީގެ ތަރައްގީގައި މުހިންމު ބައިވެރިއެކެވެ.
އޭނާގެ “ޗާލާކީ” ޒަމާނުގައި އޭދަފުށީގައި ވަރަށް ފުޅާކޮށް ވިޔަފާރި ހިންގެވި އެވެ. އަމިއްލަ މަސްދޯނިފަހަރާއި މުދާ އުފުލާ ދޯނިފަހަރު ގެންގުޅުއްވި އެވެ. ބ. އަތޮޅުގައި ފަޅުރަށްރަށް ބެލެހެއްޓެވި އެވެ. ގޭގައި ފިހާރައެއް ހިންގަވައި އަދި ބަކަރި ގެންގުޅުއްވި އެވެ. މިހާރު މުހައްމަދު އަލީ ގެންގުޅުއްވާ ފެރީތައް ވަނީ ކޮންޓްރެކްޓް އުސޫލުން އެމްޓީސީސީ އަށް ދޫކޮށްފަ އެވެ.
މުހައްމަދު އަލީ އެންމެ ބޮޑަށް ބޭނުންވި ކަމަކީ އޭނާ މި ދުނިޔެއިން ވަކިވުމުގެ ކުރިން އަމިއްލަ ރަށުގައި މިސްކިތެއް ބިނާކޮށްދެއްވުމެވެ. މީގެ ހަތަރު ވަރަކަށް އަހަރު ކުރިން އެ މިސްކިތުގެ އަމަލީ މަސައްކަތްތައް ފަށައި، މުހައްމަދު އަލީގެ ބޭފުޅުންގެ އެހީތެރިކަމާ އެކު ނިންމައި މިދިޔަ ރޯދަމަހު ވަނީ އެ މިސްކިތް ހުޅުވައިފަ އެވެ.
“މަސްޖިދު މުހައްމަދު އަލީ” ގެ ނަމުގައި ބިނާކޮށްދެއްވި އެ މިސްކިތަކީ މިއަދުގެ ތާރީހާ ހަމައަށް ރާއްޖޭގައި ބިނާކުރެވިފައިވާ އެންމެ ފުރިހަމަ ރީތި އެއް މިސްކިތެވެ.
އެ މިސްކިތތް މިއަދު ވެފައިވަނީ އޭދަފުއްޓަށް އެތައް ބަޔަކު ޒިޔާރަތް ކުރަން ވެސް މެދުވެރިވާނެ އެއް ސަބަބަށެވެ. ރަށުގެ ތާރީހު ބަދަލުކޮށްލި ފަހުރުވެރި ބިނާއަކަށެވެ.
މުހައްމަދު އަލީގެ އާއިލާއަށް މިދަނޑިވަޅުގައި ކުރިމަތިވެފައިވާ ފުން ހިތާމާގައި “އީޓީ” ގެ ޓީމުން ބައިވެރިވެ ތައުޒިޔާކިޔަމެވެ. އަޅުގަނޑުމެން އެދެނީ އާއިލާއަށް ކެތްތެރިކަން ދެއްވައި މަރުހޫމަށް ސުވަރުގޭގެ ދާއިމީ ނިއުމަތް މިންވަރު ކުރެއްވުމެވެ.
