ބީއެމްއެލް އިން ލަންކާއަށް 25،000 ޑޮލަރު ހަދިޔާ ކޮށްފި

ތޫފާން ދީތުވާގެ ސަބަބުން ފެންބޮޑުވެ، ބޮޑެތި ގެއްލުން ލިބިފައިވާ ސްރީ ލަންކާ އަށް ބޭންކް އޮފް މޯލްޑިވްސް (ބީއެމްއެލް) އިން 25،000 ޑޮލަރު މިއަދު ހަދިޔާކޮށްފި އެވެ.

ބީއެމްއެލްގެ ފަރާތުން ލަންކާ އަށް ފައިސާގެ އެހީ ދިނީ އެ ގައުމަށް އެހީވާން ޕީއެސްއެމުން އިސްނަގައިގެން ބައެއް އަމިއްލަ މީޑިއާތަކާ ގުޅިގެން މިއަދު ހެނދުނު ފެށި ޓެލެތޯން މެދުވެރިކޮށެވެ. މި ފައިސާ ޓެލެތޯނަށް ހަވާލުކޮށްދެއްވީ ބޭންކުގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފެވެ. ފައިސާއާ ހަވާލުވެވަޑައިގެންނެވީ ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު ޢަބްދުﷲ ޔާމީން ރަޝީދެވެ.

މިހާތަނަށް މި ޓެލެތޯންގައި އެންމެ ގިނައިން ޑޮލަރު ހަދިޔާކުރީ ވެސް ބީއެމްއެލް އިންނެވެ.

އެހީ ހަވާލުކުރެއްވުމަށްފަހު ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވީ ލަންކާއަކީ ރާއްޖެއާއެކު ވިޔަފާރީގެ ގުޅުން ވަރަށް ބޮޑަށް ގާއިމުކުރެވިފައިވާ ޤައުމަކަށްވާއިރު އެ ބޭންކު މެދުވެރިކޮށްވެސް ރާއްޖެއާއި ލަންކާގެ ވިޔަފާރިތަކުގެ މެދުގައި މުއާމަލާތްތައް ކުރާ ކަމަށެވެ. އަދި ލަންކާގެ ގިނަ ބައެއްގެ އެކައުންޓުތައް ބީއެމްއެލްގައި ހުޅުވާފައިވާ ކަމަށްވެސް ވިދާޅުވިއެވެ.

މީގެ އިތުރުން ބީއެމްއެލްގެ ޕާޓްނަރުންވެސް ލަންކާގައި އެބަތިބި ކަމަށާއި އެހެންވެ މި ސަބަބުތަކާހުރެ އެ ޤައުމަށް ދިމާވެފައިވާ މި ހިތާމައިގައި ބައިވެރިވާން ނިންމެވީކަމަށް ޝަރީފް ވިދާޅުވިއެވެ.

ތޫފާން ދީތުވާ ސްރީ ލަންކާގެ އިރުމަތީ އައްސޭރި އަށް އެރުމުގެ ސަބަބުން، ބޯކޮށް ވާރޭވެހި ފެންބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތަކުގައި މިހާތަނަށް 150 އަށް ވުރެ ގިނަ މީހުން މަރުވެ އެތައް ހާސް ބަޔަކު ވަނީ ހާލުގައި ޖެހިފަ އެވެ.

ލަންކާ އަށް ރާއްޖެ އިން އެހީވާން ކުރިއަށް ގެންދާ ޓެލެތޯން އަށް މިރޭ އިރުއޮއްސުމާ ހަމައަށް 1.7 މިލިޔަނަށް ވުރެ ގިނަ ރުފިޔާ އެކި ފަރާތްތަކުން ވަނީ ހަދިޔާކޮށްފަ އެވެ. އޭގެ ތެރޭގައި ރާއްޖޭގެ އެންމެ މުއްސަނދި އެއް ކުންފުނި ކްރައުން އެންޑް ޗަމްޕާ ރިސޯޓްސް އިން 10،001 ޑޮލަރާއި ވެރިކަންކުރާ އަދި ރައްޔިތުންގެ މަޖިލީހުގެ ސުޕަމެޖޯރިޓީ ވެސް އޮންނަ ޕީއެންސީގެ ޕާލަމެންޓްރީ ގްރޫޕުން ހަދިޔާކުރި 300،000ރ. ވެސް ހިމެނެ އެވެ.

މި ޓެލެތޯނުގައި މާލެ އާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ވަނީ ބަހައްޓައިފަ އެވެ.

ދިވެހި ރުފިޔާއިން ނަމަ ޖަމާކުރާނީ 7730000796107 ނަމްބަރު އެކައުންޓަށެވެ. އަދި ޑޮލަރުން ނަމަ ޖަމާކުރާނީ 7730000796106 އަށެވެ.

މިއަދު ހެނދުނު 9:00 ގައި ފެށި ޓެލެތޯން މިރޭ މެންދަމު 1:00 ގެ ނިޔަލަށް ކުރިއަށް ގެންދާނެ އެވެ

ގުޅުންހުރި ލިޔުންތައް

ޚިޔާލު ފާޅުކުރައްވާ!

Your email address will not be published.

This site uses Akismet to reduce spam. Learn how your comment data is processed.