ރާއްޖޭގެ ބޮޑެތި ރަށްތަކުގައި ސްޕޯޓްސް އެރީނާ ހެދުމަށް ހިންގާ މަޝްރޫއުގެ އޭދަފުށީގައި އެޅުމަށް ހަމަޖެހިފައިވާ ފުޓްސަލް ދަނޑު އަޅާނީ ރަސްމީ ފުޓްބޯޅަ ދަނޑުގެ ދެކުނުން އޮތް ހުސް ބިމުގައި ކަމަށް އޭދަފުށީ ކައުންސިލުން ބުނެފި އެވެ.
އޭދަފުށީ ކައުންސިލުން ބުނިގޮތުގައި ފުޓްސަލް ދަނޑު އެޅުމަށް އެ ބިން ހަމަޖެއްސީ ރަށުގެ ކުޅިވަރު ކުޅޭ ސަރަހައްދުތަކުން ދަނޑުނެގެން އޮތް ސަރަހައްދުތަކާމެދު އެ ކައުންސިލްގައި މަޝްވަރާކުރުމަށްފަހު އެވެ.
ކައުންސިލްގެ ނާއިބްރައީސް މުހައްމަދު ނައުރީފް ވިދާޅުވީ މިހާރުގެ ރަސްމީ ފުޓްބޯޅަ ދަނޑުގެ ދެކުނުން ކުރީގެ އަންހެނުންގެ މިސްކިތް ހުރި ސަރަހައްދުން ދަނޑު އެޅުމަށް އެކަށީގެންވާ ވަރުގެ ބިމެއް ލިބޭ ކަމަށެވެ. އަދި ކޮންޓްރެކްޓަރާ އެ ބިން ހަވާލުކުރުމަށް ކައުންސިލުން ތައްޔާރުވަމުން އަންނަ ކަމަށްވެސް އޭނާ ވިދާޅުވި އެވެ.
ޔޫތް މިނިސްޓްރީގެ ކުރެހުމުގައި ވާގޮތުން ފުޓްސަލް ދަނޑު އަޅާނީ ދަނޑުގެ ދިގުމިން ދެކުނުން އުތުރަށް ވާގޮތަށް ދިގުމިނުގައި 96.4 ފޫޓް ހުންނަގޮތަށެވެ. އަދި ފުޅާމިނުގައި އިރުން ހުޅަނގަށް 76.3 ފޫޓަށެވެ. އެ ކުރެހުމުގައި ވާގޮތުން ފުޓްސަލް ދަނޑުގެ އިތުރުން އެ ސަރަހައްދުގައި ބާސްކެޓް ކޯޓަކާއި ވޮލީކޯޓެއްވެސް އެޅުމަށް ޕްލޭން ކުރެވިފައިވެ އެވެ.
ސަރުކާރުން މިއަހަރު ތެރޭގައި ގާއިމްކުރުމަށް ނިންމާފައިވާ ސްޕޯޓްސް އެރީނާ ތަކުގެ ތެރެއިން އޭދަފުށީގައި އަޅާ ފުޓްސަލް ދަނޑު އެޅުމަށް މިދިޔަ މަހު ވަނީ ލޯން ސްޓާ ޓްރޭޑިންއާ ހަވާލުކޮށްފަ އެވެ.