ވާރޭ ނުވެހޭތާ ގިނަ ދުވަސްތަކެއްވުމާ ގުޅިގެން އޭދަފުއްޓަށް ބޯ ފެނުގެ ދަތިކަން ވަރަށް ބޮޑަށް ކުރިމަތިވެފައިވާތީ، އެކަން ހައްލުކުރުމުގެ ގޮތުން ޑީސެލިނޭޝަން ޕްލާންޓުން އުފައްދާ ފެން ހިލޭ ދޫކުރަން ފަށައިފި އެވެ.
އޭދަފުށީ ކައުންސިލުން ބުނީ އެ އިދާރާއާއި ފެނަކައިގެ މުވައްޒަފުން ގުޅިގެން ފެންޕްލާންޓް މަރާމާތަށްފަހު އިއްޔެއިން ފެށިގެން ފެންދޫކުރަން ފަށާފައިވާ ކަމަށެވެ.
ކައުންސިލުން ބުނީ ޕްލާންޓް ފެން ދޫކުރަމުންގެންދާނީ ހަމައެކަނި ރަށުގެ އާންމު ގޭގޭ ގެ ބޭނުންތަކަށް އެކަނި ކަމަށެވެ. އެގޮތުން ފެން ދޫކުރަމުންދާނީ ކޮންމެ ދުވަހަކުވެސް ހަވީރު 4:00 ން 5:30ށް ސަހަރާ އިސްކުރުބަރިން ކަމަށްވެސް ކައުންސިލުން ބުންޏެވެ.
ޕްލާންޓް ފެން ބޭނުން ކުރުމުގައި އާންމުން ވީހާވެސް އިސްރާފު ކުޑަގޮތަކަށް އަދި ބޭނުންނެތް ގޮތުގައި ފެން ނުގެންދިއުމަށް ކައުންސިލުންވަނީ އިލްތިމާސްކޮށްފަ އެވެ.
އެނގިފައިވާ ގޮތުގައި އެ ޕްލާންޓުން ގަޑިއަކު 800 ލިޓަރުގެ ފެން ތައްޔާރު ކުރެވެ އެވެ.
މިދިޔަ އަހަރުވެސް އޭދަފުއްޓަށް ބޯ ފެނުގެ ދަތިކަން ކުރިމަތިވެގެން ރަށު ކައުންސިލާ އިންޖީނުގޭގެ މުވައްޒަފުން ގުޅިގެން އާއްމުންނަށް ޕްލާންޓް ފެން ދޫކޮށްފައިވެ އެވެ.