ރޯޔަލް އެކްސަސް ކްލަބް (އާރުއޭސީ) ފުޓްސަލް މުބާރާތުގެ ޗެމްޕިއަންކަން ސިކްސް ޕްލަސް ވަން(އެސްޕީއޯ) ހޯދައިފި އެވެ.
ރޯޔަލް އައިލެންޑް ރިސޯޓުގައި މަސައްކަތްކުރާ މުވައްޒަފުންގެ މެދުގައި، އެ ރިސޯޓުގެ އެކްސަސް ކްލަބުން ބޭއްވި މުބާރާތް އެސްޕީއޯ ކާމިޔާބު ކުރީ ފައިނަލުގައި މިއަދު ހަވީރު އެފްސީ ރެވެނިއުއާ ވާދަކޮށް ޕެނަލްޓީ ޖަހައިގެން 7-8 އިން ކާމިޔާބުކޮށްގެންނެވެ. މެޗުގެ ފުރިހަމަ ވަގުތު ހަމަވިއިރު ނަތީޖާ އޮތީ 2-2 އިން އެއްވަރުވެފަ އެވެ.
މުބާރާތުގެ އެންމެ މޮޅު ހަ ކުޅުންތެރިންނަށް ހޮވުނީ އެފްސީ ރެވެނިއުގެ ސާމީ އިބްރާހީމް އާއި، މުހައްމަދު ރިޔާޒުއާއި އެސްޕީއޯގެ މުއާޒު އަލީއާއި އަނަސް މުހައްމަދު އާއި އެފްބީ ޓެލެންޓުގެ އިސްމަތު ވަހީދު އަދި މެގަ ވޯޓުގެ މުހައްމަދު ރަޝީދެވެ.
އެންމެގިނަ ގޯލް ޖެހި ކުޅުންތެރިޔާއަށް ހޮވުނީ ފައިނަލު މެޗުގެ މޮޅު ކުޅުންތެރިޔާގެ މަގާމު ހޯދި އެފްސީ ރެވެނިއުގެ މުހައްމަދު ރިޔާޒު އެވެ. މުބާރާތުގެ ފެއާ ޕްލޭ ޓިމަކީ ޓީމު އެއިޓް އެވެ.
ރޯޔަލް ރިސޯޓްގެ ފުޓްސަލް ދަނޑުގައި ބޭއްވި މުބާރާތުގެ ފައިނަލް މެޗަށް ފަހު އިނާމް ދެއްވީ ރިސޯޓުގެ މެނޭޖަރު މުހައްމަދު ރަޝާދު އާއި އަތޮޅު ކައުންސިލްގެ ބައެއް މެންބަރުންނެވެ.
މުބާރާތުގެ ޗެމްޕިއަން ޓީމަށް 10،000ރ. ދިން އިރު ރަނަރަޕް ޓީމަށް 5000ރ. ދީީފައިވެ އެވެ.
