ބެޑްމިންޓަން އެސޯސިއޭޝަން އޮފް މޯލްޑިވްސް އިން މިއަހަރު ބާއްވާ 13 ވަނަ އިންޓަ ސްކޫލް ބެޑްމިންޓަން މުބާރާތުގައި ބ. އަތޮޅު ތައުލީމީ މަރުކަޒުގެ ޓީމެއް ވާދަކުރާނެ ކަމަށް އެ ސްކޫލުން ބުނެފި އެވެ.
މާޗު މަހުގެ 15 އިން 23 އަށް މާލޭގައި ބޭއްވުމަށް ހަމަޖެހިފައިވާ މުބާރާތުގައި ބ. އަތޮޅު ތައުލީމީ މަރުކަޒުގެ އިތުން އިތުރުން މ. އަތޮޅު ތައުލީމީ މަރުކަޒާއި، ނ އަތޮޅު މޭނާ ސްކޫލާއި، ވ. ކެޔޮދޫ ސްކޫލުގެ އިތުރުން ލާލޭ އިންޓަނޭޝަނަލް ސްކޫލާއި އިސްކަންދރު ސްކޫލް އަދި އަހްމަދިއްޔާ އިންޓަނޭޝަނަލް ސްކޫލުން ވާދަކުރާނެ އެވެ.
މިއަހަރުގެ އިންޓަ ސްކޫލް ބެޑްމިންޓަން މުބާރާތް ކުރިއަށްދާނީ ދެ ކެޓަގަރީއަކަށް ބަހާލައިގެންނެވެ. އެއީ އަމިއްލަ އިވެންޓުތަކުގެ ކުޅުމާއި ޓީމް އިވެންޓުގެ ކުޅުމެވެ.
ތައުލީމީ މަރުކަޒުން ބުުނި ގޮތުގައި އެ ސްކޫލުން މުބާރާތުގައި ވާދަކުރާނީ 16 އަހަރުން ދަށުގެ ޓީމު އިވެންޓްގަ އެވެ. މުބާރާޓުގައި ވާދަކުރާ ބެޑްމިންޓަން ޓީމު މާލެ ފުރުމަށް ހަމަޖެހިފައިވަނީ މާދަމާ އެވެ.
ބ. އަތޮޅު ތައުލީމީ މަރުކަޒުގެ ބެޑްމިންޓަން ޓީމު ސްޕޮންސާ ކޮށްފައިވަނީ އެފްރޯ ސާވިސް ސެންޓަރާއި ޖީ ނައިން ޓްރޭޑަސް އިންނެވެ.
ބެޑްމިންޓަނަކީ އޭދަފުށިގައި މިހާރު ޒުވާނުން ފޯރިއާއެކު ކުޅޭ ކުޅިވަރެކެވެ. ފުޓްބޯޅައިގެ އިތުރުން ބެޑްމިންޓަނުންވެސް އޭދަފުށި އަންނަނީ ބޮޑެތި ކާމިޔާބީ ތަކެއް ހޯދަމުންނެވެ. އެގޮތުން އަތޮޅު ލީގު ބެޑްމިންޓަން މުބާރާތުގެ ތަށި އޭދަފުށީން ވަނީ މިދިޔަ އަހަރު މިލްކުވެސް ކޮށްފައެވެ.