ކުޅިވަރާ ބެހޭ މިނިސްޓްރީން ހިންގާ ސްޕޯޓްސް އެރީނާ ޕްރޮޖެކްޓްގެ ދަށުން، އޭދަފުށީގައި ގާއިމުކުރާ ފުޓްސަލް ދަނޑު އަޅާ ނިމިއްޖެ އެވެ.
މިހާރު ކުރިއަށްދަނީ ފުޓްސަލް ދަނޑު ނިންމުމަށް ބޭނުންވާ ފްލޯ ޓައިލްސް (މެޓް) ޖެހުމުގެ މަސައްކަތެވެ.
އިންޑިއާގެ ކުންފުންޏެއް ކަމަށްވާ ގްރޭޓާ ސްޕޯޓްސް އިންފްރާއާ ހާވާލުކޮށްފައިވާ އެ މަސައްކަތް މިއަދުގެ ނިޔަލަށް ނިންމާލެވޭވަރު ވާނެކަމަށް އެ ކުންފުންނާ ހަވާލާދީ މިރަށު ކައުންސިލުން ބުންޏެވެ.
ދަނޑުގައި އަޅާ މެޓަކީ ކޮލިޓީގެ ގޮތުން ވަރަށް ރަނގަޅު، ކުޅުންތެރިންނަށް ވެސް ފަސޭހަ، ރައްކާތެރި މެޓަކަށްނޭކަމަށް ކުޅިވަރާބެހޭ މިނިސްޓްރީން ވަނީ ބުނެފަ އެވެ.
ފުޓްބޯޅަ ދަނޑުގެ އިރުން، ކުރީގެ ވޮލީ ކޯޓް އޮތް ސަރަހައްދުގައި އެޅި ފުޓްސަލް ދަނޑު ބަލަހައްޓާނީ ކުޅިވަރާ ބެހޭ މިނިސްޓްރީންނެވެ. އެ ދަނޑު ރަސްމީކޮށް ހުޅުވުމަށް ވާންޖެހޭ ތައްޔާރީތައް ވަމުން އަންނަ ކަމަށް ސްޕޯޓްސް މިނިސްޓްރީން ބުންޏެވެ.
މިދިޔަ އަހަރުގެ ޖުލައި މަހުގެތެރޭ ދަނޑުގެ އަމަލީ މަސައްކަތްފަށައި އަދި ސެޕްޓެމްބަރު މަހުގެ ނިޔަލަށް ދަނޑުގެ މަސައްކަތް ނިންމަށް ކޮންޓްރެކްޓަރާ ހަވާލުކޮށްފައިވީ ނަމަވެސް “އެކި ސަބަބުތަކާހެދި” ދަނޑު ނިންމާލެވިފައި މިވަނީ ނިންމަންޖެހޭ ތާރީޚަށްވުރެ ފަސް މަސްދުވަސް ފަހުންނެވެ.
