ބ. އަތޮޅުގައި ހިންގަމުންދާ ސޮނޭވާ ފުށި ރިސޯޓުގެ މުވައްޒަފުންގެ މެދުގައި ‘ސޮނޭވާ އައިޑަލް’ ގެ ނަމުގައި ފެށި ލަވަ މުބާރާތުގެ ފައިނަލު ޝޯ މިރޭ އޮންނާނެ އެވެ.
އާއްމުކޮށް ހުރިހާ މުވައްޒިފުންނަށް ހުޅުވާލައިގެން ބޭއްވި މި ލަވަ މުބާރާތް ކުރިއަށް ގެންގޮސްފައިވަނީ ބައިވެރިންގެ މެދުގައި އޮޑިޝަނެއް ބޭއްވުމަށްފަހު، އެވެ. އެގޮތުން 12 ސްޓާފުން ވާދަކުރި މި މުބާރާތުގެ ފައިނަލް ރައުންޑަށް ހޮވިފައިވަނީ 4 ފަރާތެކެވެ.
ސޮނޭވާ ފުށިން ބުނީ މުވައްޒަފުންގެ ރެކްރިއޭޝަން ހަރަކާތެއްގެ ގޮތުގައި ފެށި މި މުބާރާތް މިއަހަރުން ފެށިގެން ކޮންމެ އަހަރަކު ބާއްވާ ގޮތަށް ހަމަޖެހިފައިވާ ކަމަށެވެ.
އެއްވަނަ އަށް ދާ ފަރާތަކަށް 500 ޑޮލަރު (7710 ރުފިޔާ) ދޭގޮތަށް ބާއްވާ މުބާރާތުގެ ފައިނަލް ޝަރަފުވެރިކޮށް ދިނުމަށް ރާއްޖޭގެ މަޝްހޫރު ލަވަކިޔުންތެރިން ބައިވެރިވާނެ ކަމަށް އެ ރިސޯޓުން ބުނެ އެވެ.