ބ. ކިހާދޫ ސްކޫލުގެ ދަރިވަރުންނަށް އަމާޒުކޮށްގެން ފުޓްބޯޅަ ކޯޗިން ކޭމްޕެއް ފަށައިފި އެވެ.
އެ ސްކޫލުގެ ދަރިވަރުންނަށް ފުޓްބޯޅައިގެ ހުނަރުތައް ދަސްކޮށްދީ ޗުއްޓީ ފައިދާ ހުރިގޮތުގައި ހޭދަކުރުމުގެ މަގުސަދުގައި ފެށި މި ކޯޗިން ކޭމްޕްގައި އިރުޝާދު ދެއްވަނީ ރާއްޖޭގެ ކުރީގެ މަޝްހޫރު ފުޓްބޯޅަ ކުޅުންތެރިޔާ މޫސާ މަނިކު (ކުޑަ މޫސަ) އެވެ. ކޭމްޕްގައި ކުޑަ މޫސައާއެކު ކިހާދޫ ފުޓްބޯޅަ ޓީމުގެ ބައެއް ޒުވާން ކުޅުންތެރިން ދަރިވަރުންނަށް އެހީތެރިވެ އެވެ.
ކިހާދޫ ސްކޫލުން ބުނިގޮތުގައި އެ ސްކޫލުގެ ގްރޭޑް 1 ން 10 ގައި ކިޔަވާ ހުރިހާ ފިރިހެން ދަރިވަރުން ބައިވެރިވާ މި ކޭމްޕްގައި ފުޓްބޯލައިގެ ތެރެއިން ދަރިވަރުންނަށް އުސޫލުތަކާއި ގަވައިދުތަކަށް އިހުތިރާމު ކުރުމަށް ވަރަށްބޮޑަށް ދަސްކޮށްދެވޭނެ އެވެ. 43 ކުދިން ބައިވެރިވާ ކޭމްޕް ކުރިއަށްދާނީ އަންނަ ހޮނިހިރު ދުވަހުގެ ނިޔަލަށެވެ.
ކިހާދޫ ސްކޫލުން ބުނިގޮތުގައި މި ކޭމްޕަށް އެ ސްކޫލުގެ ދަރިވަރުންނާއި ބެލެނިވެރިންގެ ފަރާތުން ވަރަށްބޮޑު އެއްބާރުލުމެއް ލިބެ އެވެ.
