އެކުވެރިކަމުގެ މެޗެއްގައި ރޭ ދިވެހިރާއްޖެ އާއި ތަޖިކިސްތާން ބައްދަލުކުރި މެޗު 0-2 ގެ ނަތީޖާއަކުން ތަޖިކިސްތާނުން ކާމިޔާބުކޮށްފިއެވެ.
ފުރަތަމަ ހާފުގައި ތަޖިކިސްތާނުން ފުރަތަމަ ލަނޑު ޖެހިއިރު، އެމީހުންގެ ދެވަނަ ލަނޑު ޖަހައިފައިވަނީ ދެވަނަ ހާފުގަ އެވެ. މިމެޗުގައި ރާއްޖެއަށް ތަޖިކިސްތާނުގެ ގޯލަށް ނުރައްކާކުރާނޭ ގިނަ ފުރުސަތުތަކެއް ލިބުނުނަމަވެސް އެފުރުސަތުތައް ވަނީ އެންމެ ރަނގަޅަށް ބޭނުންހިފޭގޮތް ނުވެފަ އެވެ.
މިމެޗަށް ނެގި ސްކޮޑުން ޖާގަ ހޯދައިފައިވާ އޭދަފުށީ ދެކުޅުންތެރިން ކަމަށްވާ މުހައްމަދު ޝިފާން (ކުޑައްޓޭ) އާއި ޝާފިއު އަހުމަދު ވަނީ ފުރަތަމަ އެގާރައިގައި ހިމުނިގެން ކުޅެފަ އެވެ. އަދި މިމެޗުގެ 86 ވަނަ މިނިޓުގައި، ކެޕްޓަން ބޭންޑް އަޅައިގެން ކުޅުނު މުހައްމަދު އާރިފް (ބަކާ) ބަދަޔުކުރުމާއެކު، މެޗުގެ ބާކީ ބައިގައި ކެޕްޓަންކަންކުރީ ޝިފާނެވެ.
ގައުމީ ޓީމުގެ އާ ކޯޗު، ވެލިޒާ ޕޮޕޯވްގެ އިރުށާދުގެ ދަށުން ކުޅެވުނު މިމެޗުގެ ޓިކެޓު ވިއްކައިގެން ލިބުނު ފައިސާ ވަނީ ޑައުންސިންޑްރޯމް އެސޯސިއޭޝަން އޮފް މޯލްޑިވްސް އަށް ހަދިޔާ ކޮށްފަ އެވެ.