ބ. މާޅޮހު ކައުންސިލަރުން އެރަށުގެ ކޮންމެ ގެއަކަށް ބިސް ޓްރޭއެއް ހަދިޔާކުރައްވައިފި އެވެ.
މާޅޮހު ކައުންސިލުގެ ރައީސް އަބްދުﷲ ޝުޖާއު ވިދާޅުވީ އެ ރަށުގައި މީހުން ދިރިއުޅޭ ކޮންމެ ގެއަކަށް 30 ބިހުގެ ބިސްޓްރޭއެއް ހަދިޔާކުރީ ރޯދަ މަހު ކައުންސިލަރުންގެ ފަރާތުން ރައްޔިތުންނަށް ކޮންމެވެސް އެހީތެރިކަމެއް ފޯރުކޮށްދިނުމުގެ ގޮތުން ކަމަށެވެ. މިދިޔަ އަހަރުން އެރަށު ކައުންސިލަރުން ވަނީ ރަށުގެ ކޮންމެ ގެއަކަށް 15 އޮރެންޖް ބަހައިފަ އެވެ.
“މިއީ މިހާރު މި އޮންނަ ކައުންސިލުން މިދިޔަ އަހަރުން ފެށިގެން ކުރަމުން އަންނަ ކަމެއް. މިދިޔަ އަހަރު ބެހީ އޮރެންޖު. މިއަހަރު އަޅުގަނޑުމެން މި ބަހާލީ މީހުން ދިރިއުޅޭ ކޮންމެ ގެއަކަށް ބިސްޓްރޭއެއް. ހުރިހާ ކައުންސިލަރުންގެ ބައިވެރިވުމާއެކު ކުރާ ކަމެއް މިއީ،” ޝުޖާއު ވިދާޅުވި އެވެ.
އާބާދީގައި 675 މީހުން ދިރިއުޅޭ މާޅޮހުގައި 5 ކައުންސިލަރުން ތިއްބަވަ އެވެ.