މާލެއިން ފުރައިގެން މުދާ ބަރުކޮށްގެން 10 މީހުންނާ އެކު ދަރަވަންދޫއަށް ދަތުރުކުރި އެރަށު “ކުރިމަގު ބޯޓް” އަޑިއަށް ހިގައްޖެ އެވެ.
ވިޔަފާރި މުދާ ބަރުކޮށްގެން ދަރަވަންދޫއަށް ދަތުރުކުރި “ކުރިމަގު ބޯޓް” އޭދަފުއްޓާ 17 ވަރަކަށް މޭލު ބޭރުން ކާށިދޫ ކަނޑަށް އަޑިއަށް ގޮސްފައި ވަނީ މިއަދު ހެނދުނު އިންޖީނު ހުއްޓިގެން ދިޔަވެގެން ކަމަށް އެ ދޯނީގެ ކެޕްޓަނާ ހަވާލާދީ ފުލުހުން ބުންޏެވެ. އަދި ދިޔަވާން ދިމާވި މޫސުންގެ ކަނޑު ގަދަވުމުން ކަމަށްވެ އެވެ.
އަޑިއަށް ދިޔަ ނާލު ބޯޓް ކައިރި އަށް ޑުސިޓް ތާނީ ރިސޯޓުން ދިޔަ ލޯންޗެއްގައި އެ ދޯނިން ދަތުރުކުރި 10 މީހުން ސަލާމަތްކޮށް އެ ލޯންޗަށް ނަގައި މިހާރުވަނީ ރަށަށް ގެނެސްފައެވެ. ލޯންޗު އެ ސަރަހައްދަށް ދިޔައިރު އޭގައި ތިބިމީހުން ތިބީ ލައިފް ޖެކެޓްއަޅައިގެން ކަނޑު މަތީގައެވެ. އޭގެ ތެރޭގައި އަހަރު ނުވާ ކުޑަކުއްޖަކާއި ދެ އަންހެނުން ހިމެނެ އެވެ. އެ އެންމެންގެ ހާލުވެސް ރަނގަޅެވެ.
ނަމަވެސް ކުރިމަގު ބޯޓް އޮތީ މުދަލާއެކު ކަނޑު އަޑީގައެވެ. އެ ދޯނީގައި ދަރަވަންދޫ ވިޔަފާރިވެރިންގެ މުދަލުގެ އިތުރުން އޭދަފުއްޓާއި މާޅޮހުގެ ބައެއް ވިޔަފާރިވެރިންގެ ގިނަ އަދަދެއްގެ މުދާ ހުރިކަމަށްވެ އެވެ.
