ބ. އަތޮޅު ރިސޯޓެއް ކަމަށްވާ ސޮނެވާފުށީގައި މިނިވަން 50 ފެށިގެން ދިޔައީ 26 ވަނަ ދުވަހު ހެނދުނު އޮތް ދިދަ ނެގުމުގެ ރަސްމިއްޔާތުންނެވެ.
މިނިވަން 50 ފާހަގަ ކުރުމުގެ ގޮތުން ސޮނެވާފުށީގެ މުވައްޒަފުންގެ ސަރަހައްދު ވަނީ ވަރަށް ރީތިކޮށް ގައުމީ ދިދައިން ޒީނަތްތެރި ކޮށްފައެވެ.
އަދި މިނިވަން ދުވަހުގެ ހާއްސަ ފުޅަނދު ބުރަށް ތައްޔާރުވުމުގެ ގޮތުން ތިން ދުވަސް ކުރިން ފެށިގެން ސޮނެވާފުށީގެ ހުރިހާ ޑިޕާޓްމަންޓްތަކެއް ދިޔައީ މި މަހުގެ 26 ވަނަ ދުވަހުގެ ރޭގަނޑު އޮންނަ ހާއްސަ ފުޅަނދު ބުރަށް ތައްޔާރު ވަމުންނެވެ.
“އަޅުގަނޑުމެން ރޭގަނޑުގެ ހަރަކާތްތައް ފެށީ ހާއްސަ ދިވެހި ޑިނަރ (ރޭނގަޑުގެ ކެއުން)އަކުން. ދެން ފެއްޓީ ފުޅަނދު ބުރު. އެއް ބަޔަކު ދައްކުވައިދިނީ ކާބަފައިންގެ މަސްވެރިކަމަށް ހުންނަ ފޯރި. އަނެއް ބަޔަކު ދައްކުވައިދިނީ ދިވެހިން ޕޯޗްގީޒުންގެ އަތްދަށުން ސަލާމަތްކުރި މުހައްމަދު ތަކުރުފާނުގެ ކަޅުއޮށްފުއްމި. ދެން ފެނިގެން ދިޔައީ އެއިރު ރާއްޖޭގައި ޕޯޗްގީޒުންގެ ބާރުގެ ދަށުގައި އޮތްއިރު، އެ ބޭފުޅުން ރާއްޖޭގެ އަންހެންކުދިންނާއި ކައިވެނި ބައްލަވާހައްދަވާ ގޮތް. ކުރުކޮށް ޑްރާމާއެއް ގޮތަށް ހުރިހާ ކަމެއް ވެސް ދިޔައީ. މި ކަންތައް ނިންމާފައި ދެން ފެނިގެން ދިޔައީ ރާއްޖޭގެ މަޝްހޫރު ލައިމްސްޓޯންގެ މިއުޒިކުން މުޅި ސޮނެވާފުށި ގުގުމާލިތަން،” އެ ރިސޯޓުން ވާހަކަ ދެއްކެވި ބޭފުޅަކު ވިދާޅުވިއެވެ.