ބ. އޭދަފުށީ ހިއްކި ސަރަހައްދު ހިމާޔަތްކުރަން ރިވެޓްމެންޓް ޖެހުމަށް ހިންގާ މަޝްރޫއުގެ ދެވަނަ ފިޔަވަހީގެ މަސައްކަތް ފަށައިފި އެެވެ.
އޭދަފުށީ ކައުންސިލުގެ ރައީސް އަލީ ވަހީދު ވިދާޅުވީ އެމްޓީ ހޯގާޑުން އެ ޕްރޮޖެކްގެ ދެވަނަ ފިޔަވަހީގެ އަމަލީ މަސައްކަތް އިއްޔެ ހެނދުނު ފަށާފައިވާ ކަމަށެވެ. ދެވަނަ ފިޔަވަހީގެ ދަށުން ރަށުގެ އިރުމަތީ ހިއްކި ސަރަހައްދު ވަށައިގެން ހުޅަނގު ދެކުނަށް ގާތްގަޑަކަށް 1300 އެއްހާ މީޓަރުގައި ރިވެޓްމަންޓް ޖަހާނެ ކަމަށް ވެސް އަލީ ވަހީދު ވިދާޅުވި އެވެ.
ބަނދަރު ހެދުމާއި ބިން ހިއްކުމުގެ މަސައްކަތް ކުރަމުން އަންނަ ނެދަލޭންޑްސްގެ އެންމެ މަޝްހޫރު އެއް ކުންފުންޏާ، އޭދަފުށި ހިއްކި ސަރަހައްދު ވަށައިގެން ރިވެޓްމެންޓް ޖެހުމުގެ ދެވަނަ ފިޔަވަހީގެ މަސައްކަތް ހަވާލުކުރީ 62 ދުވަހުގެ ތެރޭގައި ނިންމުމަށެވެ.
ރިވެޓްމަންޓް ޖެހުމުގެ ދެވަނަ ފިޔަވަހީގެ މަސައްކަތް ފެށިއިރު، ފުރަތަމަ ފިޔަވަހީގެ މަސައްކަތް މިހާރުވަނީ ގާތްގަޑަކަށް ނިމުމަކާ ހަމައަށް އައިސްފަ އެވެ. އެ މަސައްކަތް އަންނަ ސެޕްޓެމްބަރު މެދެއްހާތާ އެއްކޮށް ނިންމާލެވޭވަރު ވާނެ ކަމަށް މަސައްކަތުގެ ކޮންޓްރެކްޓަރު ކެޕިޓަލު އިންވެސްޓްމަންޓުން ވަނީ ބުނެފަ އެވެ.
އެ ކުންފުނިން ބުނި ގޮތުގައި، 22.8 މިލިޔަން ރުފިޔާގެ އެ ޕްރޮޖެކްޓް ނިމޭ އިރު، ހިއްކި ސަރަހައްދުގައި 875 މީޓަރުގެ ދިގުމިނުގައި ރިވެޓްމަންޓް ޖަހާނެ އެވެ.
އޭދަފުށީ ކައުންސިލުން ބުނީ، މި ޕްރޮޖެކްޓް އެއްކޮށް ނިމޭއިރު 2000 މީޓަރަށްވުރެ ބޮޑު ސަރަހައްދެއްގައި ރިވެޓްމަންޓް ޖަހާނެ ކަމަށެވެ.