ބ. ފެހެންދޫގައި މިއަދު ހެނދުނު ކުޑަކުއްޖެއްގެ ބޮލަށް ޓީވީއެއް ވެއްޓި އެ ކުއްޖާ މަރުވެއްޖެ އެވެ.
މިއަދު ހެނދުނު 9:25 އެހާކަންހާއިރު ހިނގި އެ ހާދިސާގައި ނިޔާވެފައި ވަނީ އެ ރަށު ބްލޫހައުސް އުމުރުން އެއް އަހަރާ އެގާރަ މަހުގެ އަމާނީ އަބްދުﷲ އެވެ.
ފުލުހުން ބުނީ އެ ހާދިސާ ހިނގާފައިވަނީ ތިން އަހަރުގެ ކުއްޖަކާއި އެއް އަހަރާ 11 މަހުގެ ކުއްޖަކު އެ ކުދިންގެ ގޭ ތެރޭގައި ކުޅެން އުޅުމުގެ ތެރޭގައި ކަމަށެވެ. އެ ހާދިސާގައި މަރުވެފައި ވަނީ އެއް އަހަރުގެ އަންހެން ކުއްޖާ ކަމަށް ފުލުހުން ބުންޏެވެ.
އެ ރަށުން ވާހަކަ ދެއްކި މީހަކު ބުނެފައިވަނީ މޭޒެއްގެ މަތީގައި ބަހައްޓާފައި ހުރި 32 އިންޗީގެ ފޮށިގަނޑު ލީ ޓީވީ ވެއްޓުނީ އެ ދެ ކުދިންގެ ގަޔަށް ކަމަށެވެ. އަދި ޓީވީ ވެއްޓުނު އިރު އެ ކުދިންގެ މަންމަ ހުރީ ބަދިގޭގައި ސައިކަންކަން ކަމަށް ވެސް އޭނާ ބުންޏެވެ.
އަސްރު ނަމާދަށް ފަހު މަރުވި ކުއްޖާ މިހާރު ވަނީ ވަޅުލާފަ އެވެ. ފުލުހުން އެ މައްސަލަ މިހާރު ތަހުގީގު ކުރަމުން އަންނަ ކަމަށެވެ.
