ނުކުޅެދުންތެރިކަން ހުންނަ ކުދިންނަށް ހާއްސަކޮށްގެން ސ. ހިތަދޫ ޝަރަފުއްދީން ސްކޫލްގައި ހިންގާ “ނޫރު” ސެންޓަރުގައި ދަރިވަރުންނަށް ކިޔަވައިދިނުމަށް ބޭނުންވާ އެއްލައްކަ ރުފިޔާގެ ތަކެތި ދިރާގުން ހަދިޔާކޮށްފި އެވެ.
ހިތަދޫ ނޫރު ސެންޓަރުގައި މިއަދު ބޭއްވި ރަސްމިއްޔާތުގައި މި ތަކެތި އެ ސެންޓަރާ ހަވާލުކޮށްދެއްވީ ކުންފުނީގެ ސީއީއޯ އަދި މެނޭޖިން ޑިރެކްޓަރު އިސްމާއިލް ރަޝީދެވެ.
ދިރާގުން ބުނި ގޮތުގައި މި އެހީތެރިކަމަކީ އެ ކުންފުނީގެ އިޖްތިމާއީ ޒިންމާގެ ދަށުން ކުރާ މަސައްކަތްތަކުގެ ތެރޭގައި ހިމެނޭ ވަރަށް މުހިންމު ކަމެކެވެ.
-
• ސެރެބްރަލް ޕަލްސީ ޗެއާ
• ވޯކިން އެއިޑް
• ކޮމްޕިއުޓާ ސިސްޓަމް
• ތެރަޕީ ބޯލްސް
• ޕްލޯ މެޓް،
• ވާހަކަ ފޮތް
ޝަރަފުއްދީން ސްކޫލްގައި ހުންނަ މި ސެންޓަރުގައި، ނުކުޅެދުންތެރިކަން ހުންނަ 30 އަށް ވުރެ ގިނަ ކުދިންނަށް ހިދުމަތްދެ އެވެ. މި ކުދިންނަށް ކިޔަވައިދިނުމަށް ދާއިމީ ހަތަރު ޓީޗަރުންނާއި ވަގުތީ ހަތަރު ޓީޗަރުން އަދި ކޯޑިނޭޓަރަކު ހަރަކާތްތެރިވެ އެވެ.
އެ ސެންޓަރުން ބުނި ގޮތުގައި ދިރާގުން ހަދިޔާކުރި ވަސީލަތްތަކަކީ އެ ސެންޓަރު ހިންގުމަށް މިވަގުތު ވަރަށް ބޮޑަށް ބޭނުންޖެހިފައިވާ ތަކެއްޗެވެ. އަދި މި ތަކެއްޗަކީ ސެންޓަރުގެ ދަރިވަރުންނަށް ކިޔަވައިދިނުމުގައި ބޮޑު ދައުރެއް އަދާކުރާނެ ތަކެތި ކަމަށް ވެސް އެ ސެންޓަރުން ބުނެ އެވެ.
