މިނިވަން 50 ފުޓްބޯޅަ މުބާރާތުގެ ޒޯން 3 ގައި މިއަދު ދުވާފަރު ދެކޮޅަށް ކުޅެންދިޔަ އޭދަފުށީ ފުޓްބޯޅަ ޓީމު އެނބުރި ރަށަށް އަތުވެއްޖެ އެވެ.
މިއަދު ވިއްސާރަވެ ދުވާފަރު ދަނޑުގައި ފެން ބޮޑުވުމުގެ ސަބަބުން މި މެޗުވަނީ މިއަދު ކުޅެވޭގޮތް ނުވެފަ އެވެ.
މި މެޗު ދެން ކުޅޭނެ ދުވަހެއް އެފްއޭއެމުން އަދި ހާމައެއް ނުކުރެވެ.
ނަމަވެސް މި ޒޯނުގައި އޭދަފުއްޓާ ހިންނަވަރު ބައްދަލުކުރާ މެޗު އަންނަ އަންގާރަ ދުވަހަށް ވަނީ ޝެޑިއުލް ކޮށްފައެވެ. އެ މެޗު އޮންނާނީ އޭދަފުށީގަ އެވެ.
މިނިވަން ފަންސާސް ފުޓްބޯޅަ މުބާރާތަކީ މުޅި ރާއްޖެއަށް ހުޅުވާލައިގެން އެފްއޭ.އެމްއިން ކުރިއަށްގެންދާ މުބާރާތެކެވެ. މި މުބާރާތުގެ އަތޮޅު ބުރު މިހާރު ނިމިފައިވާއިރު ޒޯންތަކުގެ ޗެމްޕިއަނުންގެ މެދުގައި އައްޑޫ ސިޓީ އަދި ކުޅުދުއްފުށީގައި މުބާރާތުގެ ފަހުބުރު ކުޅެވޭނެ އެވެ. ޒޯންތަކުގެ ޗެމްޕިއަނުންގެ މެދުގައި ކުޅެވޭ މުބާރާތުގެ ޗެމްޕިއަން ޓީމަށް އަންނަ އަހަރުގެ ޤައުމީ ފުޓްބޯޅަ މުބާރާތުން ފުރުސަތު ލިބިގެންދާނެ އެވެ.