ކުޑަކުދިންގެ ހިޔާގައި އުޅޭ ކުދިންނަށް، ކަނޑުއަޑީގެ ރީތި މަންޒަރުތައް ވޭލް ސަބްމެރިންގައި ބަލާލުމުގެ ފުރުސަތު ދިރާގުން މިއަދު ހޯދައި ދީފި އެވެ.
ދިރާގުގެ ޕަބްލިކް ރިލޭޝަންސް މެނޭޖަރު އިމްޖާދު ވިދާޅުވީ ސްކޫލް ބަންދަކީ ހުރިހާ ކުންދިންނަށް ވެސް ކިޔެވުމުގެ ދިގު އަހަރަކަށް ފަހު، ހިތްހަމަޖައްސާލާ ވަގުތުކޮޅެއް ހޭދަކޮށްލުމަށް ލިބޭ ފުރުސަތަކަށް ވާއިރު ކުޑަކުދިންގެ ހިޔާގެ ކުދިންނަށް ވެސް އެ ފުރުސަތު ލިބެންޖެހޭނެ ކަމަށެވެ.
ކަނޑުއަޑީގެ ރީތިކަން ދައްކާލައި ކުދިން މަޖާކޮށްލައި، ހިތްހަމަޖައްސާލުމުގެ ގޮތުން ދިރާގުން ހަދިޔާކުރި މި ދަތުރު އޮތީ މިއަދު ހެނދުނެވެ.
އިމްޖާދު ވިދާޅުވި ގޮތުގައި މި ދަތުރުގައި ކުދިންނާ އެކީ ދިރާގާއި ކުޑަކުދިންގެ ހިޔާގެ ބައެއް މުވައްޒަފުން ވެސް ބައިވެރިވި އެވެ.
“ކަނޑުއަޑިގެ ތަފާތު މަންޒަރުތަކާއި ތަފާތު އެކި މަސް ފަދަ ތަކެތި ފެނުމުން އެ ކުދިން ތިބީ ވަރަށް ހިތްހަމަޖެހި، އުފާވެފައި،” އޭނާ ވިދާޅުވި އެވެ.
ދިރާގުން ވަނީ މީގެ ކުރިން ވެސް އަހަރުތަކުގައި ސްކޫލް ބަންދާ ދިމާކޮށް، ކުޑަކުދިންގެ ހިޔާގައި ތިބޭ ކުދިންނަށް ހާއްސަ ހަރަކާތްތައް ހިންގައިފަ އެވެ. އެގޮތުން މިދިޔަ އަހަރު ދިރާގުން ވަނީ “މެޖިކް ޝޯ އޮފް ސަމޯއާ” އަށް އެ ކުދިން ގެންގޮސްފަ އެވެ.
ދިރާގުން އަންނަނީ ހާއްސަ އެހީއަށް ބޭނުންވާ ކުދިންނާއި ކުޑަކުދިންގެ ހައްގުތައް ރައްކާކޮށްދިނުމުގެ ގޮތުން ގިނަ ހަރަކާތްތަކެއް ރާވައި އަދި އެފަދަ ކަންކަމުގައި ބައިވެރިވަމުން ނެވެ.