މޯލްޑިވްސް އިންލަންޑް ރެވެނިއު އޮތޯރިޓީ މީރާގެ ކަލެކްޝަން ސެންޓަރެއް ބ. އޭދަފުށީގައި ހުޅުވައިފި އެވެ.
މީރާ އިން ބުނި ގޮތުގައި އޭދަފުށީގައި މިއަދު ހުޅުވި ކަލެކްޝަން ސެންޓަރުގައި ޓެކްސް ދައްކަންޖެހޭ ފަރާތްތައް ރަޖިސްޓަރ ކުރުމާއި، ޓެކްސް ބަޔާންތައް ބަލައިގަނެ ފައިސާ ބަލައިގަތުން ފަދަ ހިދުމަތްތައް ދެމުން ގެންދާނެ އެވެ.
އަދި މާލޭގައި ހުންނަ ހެޑް އޮފީހުން ލިބޭ މައިގަނޑު ހުރިހާ ހިދުމަތްތަކެއް ވެސް އެ ސެންޓަރުން ލިބޭނެ ކަމަށް އެތަނުން ބުންޏެވެ.
މީގެ އިތުރުން އާއްމުންނަށާއި ވިޔަފާރިކުރާ ފަރާތްތަކަށް ޓެކުހާބެހޭ މައުލޫމާތު ދިނުމުގެ ސެމިނާތަކާއި ތަމްރީން ޕްރޮގްރާމުތަކާއި ހޭލުންތެރިކުރުމުގެ ޕްރޮގްރާމުތައް ހިންގާނެކަމަށްވެސް މީރާއިން ބުނެއެވެ.
މީރާގެ އޭދަފުށީ ކަލެކްޝަން ސެންޓަރު ހުންނަނީ އަތޮޅު ގޭގެ ބާ އިމާރާތުގެ ދެވަނަ ފަންގިފިލާގަ އެވެ.
މީރާއިން އަންނަނީ 2016 އަހަރު ނިމުމުގެ ކުރިން ހުރިހާ އަތޮޅެއްގައިވެސް މީރާގެ ކަލެކްޝަން ސެންޓަރުތައް ހުޅުވަން ތައްޔާރުވަމުންނެވެ. މީރާގެ އޮފީސްތައް އަތޮޅު ތެރޭގައި މިހާތަނަށް ހުޅުވާފައިވަނީ ހދ. ކުޅުދުއްފުށީގަ އާއި އައްޑު އަތޮޅުގަ އެވެ.