ބ. އަތޮޅު ތައުލީމީ މަރުކަޒަށް ދިމާވެފައިވާ ޖާގައިގެ ދަތިކަން ހައްލުކުރުމަށް، ހަތަރު ބުރީގެ އާ އިމާރާތެއް އެޅުމަށް 9 މިލިއަން ރުފިޔާ އަށް މާރިސް ކޮންސްޓަރަކްޝަން ޕްރައިވެޓް ލިމިޓެޑާ މިއަދު ހަވާލުކޮށްފި އެވެ.
އެޑިއުކޭޝަން މިނިސްޓްރީގައި ބޭއްވި ރަސްމިއްޔާތެއްގައި ސްޓޭޓް މިނިސްޓަރު އަހްމަދު ޝަފީއު ވިދާޅުވީ ހަތަރު ބުރީގެ އެ އިމާރާތުގައި 9 ކްލާސް ރޫމް ހިމެނޭނެ ކަމަށެވެ.
ޝަފީއު ވިދާޅުވީ އެ މަޝްރޫއަކީ ވޯލްޑް ބޭންކާއި ސަރުކާރާއި ގުޅިގެން ކުރިއަށް ގެންދާ “އެންހޭންސް އެޑިޔުކޭޝަން ޑިވެލޮޕްމަންޓް ޕްރޮޖެކްޓް” ދަށުން ކުރިއަށް ގެންދާ މަޝްރޫއެއްކަމަށެވެ.
“މި މަޝްރޫއު ބ. އަތޮޅު ތައުލީމީ މަރުކަޒަށް އަމާޒުކުރީ އެ ސްކޫލަކީ ރަށުން ބޭރުން އެންމެ ގިނަ އަދަދަކަށް ތައުލީމު ހާސިލްކުރުމަށް އަންނަ ސްކޫލަށް ވެފައި އެ ސްކޫލުގައި ޖާގައިގެ ދަތިކަން ވަރަށް ބޮޑަށް ކުރިމަތިވެފައި ވާތީ،” ޝަފީއު ވިދާޅުވި އެވެ.
އެ އިމާރާތް އަޅަން ހަމަޖައްސާފައިވަނީ އައިއެޗްޑީޕީ ޕްރޮޖެކްޓެގެ ދަށުން އެޅި އިމާރާތާ ޖެހިގެން އޮތް ހުސްބިމުގަ އެވެ. އެ އިމާރާތުގެ މަސައްކަތް އަންނަ އަހަރުގެ ކިޔެވުން ފެށެންވާއިރަށް ނިންމާލެވޭނެ ކަމަށް އެޑިޔުކޭޝަނުން ބުންޏެވެ.
ކިތަންމެ ކަމެއް މިރަށަށް ކޮށްދިނަސް މިސަރުކާރުން ކަމެއް ކޮށްދޭކަމަކަށް ނުވާނެ. ހޮސްޕިޓަލް ވަހީދުއަށް ދަންނަވާލަން އޮތީ ލޮލުގެ ޑޮކްޓަރުންކޮޅެއް ތަންކޮޅެއް ކައިރި މުސްތަޤްބަލެއްގައި ގެނެސްދޭށޭ.