ބ. އަތޮޅު ކަނިފުށީގައި ތަރައްގީ ކުރަމުންދާ “ފިނޮޅު” ރިސޯޓްގައި މަސައްކަތްކުރާ ގިނަ އަދަދެއްގެ ބީދޭސީންތަކެއް ކާނާ ވިހަވެގެން ބ. އަތޮޅު ހޮސްޕިޓަލުގައި ފަރުވާ ދޭން ފަށައިފި އެވެ.
ބ. އަތޮޅު ހޮސްޕިޓަލުން ބުނި ގޮތުގައި އެ ރިސޯޓްގައި މަސައްކަތް ކުރާ 50 ވަރަކަށް މީހުންވަނީ ކާނާ ވިހަވެފަ އެވެެ. އޭގެ ތެރެއިން 31 މީހަކު ބ. އަތޮޅު ހޮސްޕިޓަލަށް ގެނެސް މިހާރުދަނީ ފަރުވާ ދެމުންނެވެ.
ކާނާ ވިވަނި މީހުން ކެއިން ބުއިމާއި އެކަމޮޑޭޝަންގެ ކަންތައްތައް ހަމަޖެހިފައި އޮންނަނީ އެރަށާ ކައިރީގައި އޮންނަ ފަޅުރަށެއް ކަމަށްވާ މާ މަޑުއްވަރީގަ އެވެ. ކާނާ ވިހަވީ އެމީހުން މިއަދު މެންދުރު މާމަޑުއްވަރީގައި އެކަުމަށް ބޭނުންކުރި މަހެއްގެ ސަބަބުން ކަމަށް ވެ އެވެ.
“ކާނާ ވިހަވެގެން ހޮޑުލެވި ވަރަށްބޮޑަށް ވަރުދެރަވެފައި އެމީހުން ތިބީ. އޭގެތެރެއިން 10 މީހަކު އެޑްމިޓްކޮށްގެން ދަނީ ފަރުވާ ދެމުން. ނަމަވެސް މާބޮޑަށް ހާލު ސީރިއަސް މީހަކު ނެތް ކަމަށެވެ.” އަތޮޅު ހޮސްޕިޓަލުގެ އޮފިޝަލަކު ބުންޏެވެ.
ކަނިފުއްޓަކީ މަޝްހޫރު ކޯސްޓްލައިން ކުންފުނިން ތަރައްގީކޮށް، “ފިނޮޅު” ރިސޯޓްގެ ނަމުގައި އަންނަ މަހު ހުޅުވަން ތައްޔާރުވަމުން އަންނަ ރިސޯޓެކެވެ.
