ބ. އަތޮޅު ދިގުފަރުވިނަގަނޑުގައި ތަރައްގީކުރި “ދިގުފަރު އައިލެންޑް ރިސޯޓް” އަންނަ މަހުގެ 15 ވަނަ ދުވަހު ހުޅުވާ ގޮތަށް ހަމަޖައްސައިފި އެވެ.
ހިމާޔަތްކޮށްފައިވާ ބަޔޮސްފިއާ ރިޒާވް ސަރަހައްދުގައި ހެދި ރިސޯޓުގައި 30 ބީޗް ވިލާ އަދި ދިހަ ސެމީ ވޯޓާ ވޯޓާ ވިލާ ހުރެ އެވެ.
ދިގު ފަރެއްގެ މެދުގައި ބޮޑު ފަޅާކާ އެކު އޮންނަ ހިތްގައިމު ރީތި ރަށުގައި އެކި ގައުމުތަކުގެ ކާނާ ލިބޭ ގޮތަށް ތިން ރެސްޓޯރަންޓެއް ހަދާފައިވެ އެވެ. އޭގެ އިތުރުން “ތުނޑި ޕޫލް ބާ”ގެ ނަމުގައި ހާއްސަ ބާއެއް ވެސް ހުރެ އެވެ. އަދި އެ ރިސޯޓުގައި “ފުނަ ސްޕާ”ގެ ނަމުގައި ސްޕާއެއް ހުރެ އެވެ.
މާލެއިން ފުރައިގެން ސީ ޕްލޭނުން 45 މިނެޓުން ދެވޭ ހިސާބުގައި އޮންނަ ރަށުގައި ޑައިވިން ސްކޫލަކާއި މަސްދަތުރު ދިއުމާއި ކޯމަސް ބަލަން ދިއުމާއި ދޮންވެލި ފިނޮޅަށް ޕިކްނިކް ދިއުން ފަދަ ހަރަކާތްތައް ހިންގަން ރާވާފައިވާ ކަމަށް އެ ރިސޯޓުގެ ވެބްސައިޓްގައި ބުނެފައިވެ އެވެ.
ރާއްޖޭގެ މަޝްހޫރު ވިޔަފާރި ކުންފުނި ސްޓެޓިކް ކޮމްޕެނީގެ ހިއްސާ އޮންނަ ދިގުފަރު އިންވެސްޓްމަންޓުން ތަރައްގީކުރި ފުރަތަމަ ރިސޯޓާ އެކު އެ ކުންފުނީގެ ލަގްޒަރީ ޔޮޓް “ދާއިންކަނބާ” ގައި ޓޫރިސްޓުންނަށް ހިދުމަތް ދޭ ގޮތަށް ހަމަޖެހިފައިވެ އެވެ.
މަތީ ފެންވަރުގެ ދިހަ ވަރަކަށް ރިސޯޓު ހިންގަމުން އަންނަ ބ. އަތޮޅުގައި މިދިޔަ މަހު “ފިނޮޅު”ގެ ނަމުގައި ކަނިފުށީގައި ފަސް ތަރީގެ ފެންވަރުގެ ރިސޯޓެއް ހުޅުވާފައިވެ އެވެ. އަދި މި އަތޮޅުގައި އިތުރު ތިން ރިސޯޓެއް ހުޅުވަން ދަނީ ތައްޔާރުވަމުންނެވެ.- ޚަބަރު / މިހާރު