ބޭންކް އޮފް މޯލްޑިވްސްގެ ސެލްފް ސާވިސް އޭޓީއެމްތައް ބޭނުންކުރާއިރު ހިދުމަތް ބޭނުންކުރާއިރު ކަސްޓަމަރުން ސަމާލުކަންދޭންވީ ކަންތަކުގެ އިރުޝާދުތަކަށް އަމަލު ކުރުމަށް ބޭންކުން އިލްތިމާސް ކޮށްފިއެވެ.
ބީއެމްއެލް އިން ބުނީ މިހާރަކަށް އައިސް ނަގުދު ފައިސާ ނޫން އެހެން ބައެއް ތަކެތި އޭޓީއެމްއަށް ލުމުގެ ސަބަބުން ހިދުމަތް މެދުކެނޑިގެން ދާކަން ފާހަގަ ކުރެވިފައިވާ ކަމަށެވެ.
ރާއްޖޭގެ އެކި ކަންކޮޅުތަކުގައި ގާއިމްކޮށްފައިވާ އޭޓީއެމްގެ ހިދުމަތް ދިނުމަށް ބޭންކުގެ މުވައްޒަފުން ބުރަކޮށް މަސައްކަތް ކުރާ ކަމަށާއި ހިދުމަތް މެދުކެނޑޭ ހާލަތްތަކުގައި ހިދުމަތް ދިނުމަށްޓަކައި ބޭންކުގެ މުވައްޒަފުން އޭޓީއެމް ބަހައްޓާފައިވާ ރަށަކަށް ދަތުރުކުރަންޖެހޭއިރު، މިހާރު ހާލަތު އޮތްގޮތުން ރަށަކަށް މުވައްޒަފުން ދަތުރުކޮށް މައްސަލަ ހައްލުކުރުމަށް ވަގުތު ހޭދަވާ ކަމަށް ބޭންކުން ބުންޏެވެ.
އަދި ބުނީ އޭޓީއެމްއަށް އެހެނިހެން ތަކެތި އެޅުމުގެ ސަބަބުން ގެއްލުން ލިބި އެކަން ރަގަޅު ކުރަން ބައެއް ފަހަރު ރާއްޖެއިން ބޭރުން އާލާތް ގެންނަން ޖެހޭ ކަމަށާއި އެއީ ވެސް ވަގުތު ނަގާ ކަމެއް ކަމަށާއި އޭގެ ސަބަބުން ހިދުމަތަށް ބުރޫއަރައި އަލުން ހިދުމަތަށް އައުމަށް ވަގުތު ނަގާ ކަމަށެވެ.
ހަމައެކަނި ނަގުދު ފައިސާ އޭޓީއެމްއަށް ލުމާއެކު އޭޓީއެމް ސެންޓަރުތަކުގައި ހުންނަ އިރުޝާދުތަކާއި އެއްގޮތަށް އަމަލު ކުރަން ބެންކުން ވަނީ އެދިފަ އެވެ.
