ބ. އޭދަފުށީގައި މިއަދު ހަވީރު ދެ ސައިކަލް ޖެހި ހިނގި އެކްސިޑެންޓެއްގައި ހާލު ސީރިއަސްވި ޒުވާނާ، އިތުރު ފަރުވާއަށް މާލެ ފޮނުވައިފި އެވެ.
ބ. އަތޮޅު ހޮސްޕިޓަލުން ފަރުވާ ދިނުމަށް ފަހު، އަބްދުﷲ ފާސިރު، 18، ވާރިޔާ، މާލެ ފޮނުވާލީ ލިބުނު ގެއްލުންތައް ބޮޑުކަމުން އިތުރު ފަރުވާއަށެވެ.
ބ. އަތޮޅު ހޮސްޕިޓަލުގެ މެނޭޖަރު މުހައްމަދު ރަޝީދު ވިދާޅުވި ގޮތުގައި އެކްސިޑެންޓގައި އަބްދުﷲ ފާސިރުގެ ބޮލަށް ވަރަށް ބޮޑަށް ވަނީ ގެއްލުން ލިބިފައެވެ.
“ބެލެވޭ ގޮތުގައި ސިކުނޑިއަށް ލޭ އެޅިފައި ހުރީ،” އޭނާ ވިދާޅުވި އެވެ.
މިއަދު ހަވީރު މިރަށު ބަނދަރު މަގުގައި ހިނގި އެކްސިޑެންޓްގައި އިތުރު މީހަކަށް ވެސް ހޮސްޕިޓަލުން ފަރުވާ ދިނެވެ. ނަމަވެސް އޭނާ އަށް ސީރިއަސް ގެއްލުމެއް ނުލިބެ އެވެ.
އެކްސިޑެންޓް ހިނގަން މެދުވެރިވި ސަބަބު އަދި ޔަގީން ނުވެއެވެ. ފުލުހުން ބުނީ މި އެކްސިޑެންޓާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށެވެ.
