އޭދަފުށީގެ ކުރީގެ ފުޓްބޯޅަ ކުޅުންތެރިންގެ ޓީމަކާއި ދޮންފަނު ކުރީގެ ފުޓްބޯޅަ ކުޅުންތެރިންގެ ޓީމަކާއެކު އެކުވެރިކަމުގެ ފުޓްބޯޅަ މެޗެއް ކުޅެފި އެވެ.
ދޮންފަނުގައި އިއްޔެ ހަވީރު ކުޅުނު މި މެޗު 3-1 ކާމިޔާބުކުރީ އޭދަފުށީ ވެޓަރެންސް ޓީމެވެ. މި މެޗުގައި އޭދަފުށީގެ ޒުވާނުންގެ ޖަމިއްޔާގެ ކުރީގެ ފުޓްބޯޅަ ޓީމުން ވިދާލި ކުޅުންތެރިން ވަނީ ކުޅެފަ އެވެ. .
އޭދަފުށީ ވެޓަރެންސް ޓީމުން ބުނީ ކުރީގެ ފުޓްބޯޅަ ކުޅުންތެރިން ހިމަނައިގެން ވެޓަރެންސް ކްލަބެއް އުފެއްދުމުގެ މަސައްކަތް ކުރަމުންނެވެ.
“މިއީ ފެށުމެއް، މަގުސަދަކީ ރާއްޖެ އާއި މި ސަރަހައްދު ތަކުގައި ބާއްވާ ވެޓަރެންސް މުބާރާތް ތަކުގައި އޭދަފުށީގެ ޓީމު ވާދަކުރުން. އުއްމީދަކީ ވަރަށް އަވަހަށް އޭދަފުށީގެ ވެޓަރެންސް ކްލަބެއް ރަޖިސްޓްރީކޮށް ބޮޑެތި މި މުބާރާތްތަކުގައިވެސް ބައިވެރިވުން،” މިކަމުގައި އެންމެ އިސްކޮށް އުޅޭ އަހްމަދު ނާސިރު ބުންޏެވެ.
އޭދަފުށްޓަކީ މިހާރު ވެސް ދިވެހި ފުޓްބޯޅައިގައި މަތީ ފެންވަރުގެ އެތައް ކުޅުންތެރިންނެއް މި ރަށަކަށް ނިސްބަތްވާ ރަށެކެވެ. އެގޮތުން މިރަށުން ވަނީ ފުރަތަމަ ޑިވިޝަނަށް މޮޅު އެތައް ކުޅުންތެރިން ނެރެދީފަ އެވެ.
