ބ. ހިތާދޫގެ ބިން ހިއްކުމަށްފަހު، ހައުސިން ޔުނިޓް އަޅައިދިނުމަށް، ރައީސް އިބްރާހިމް މުހައްމަދު ސޯލިހު މިއަދު ވައުދުވެވަޑައިގެންފި އެވެ.
ރިޔާސީ އިންތިހާބުގެ ކެމްޕެއިނަށް، ބ. އަތޮޅަށް ފައްޓަވާފައިވާ ދަތުރުފުޅުގައި، މިއަދު ހަވީރު ހިތާދޫއަށް ވަޑައިގެން ބޭއްވި ބަނދަރު ބައްދަލުވުމުގައި ދެ ވަނަ ދައުރަކަށް އިންތިހާބުވެވަޑައިގެންފިނަމަ، 1،425 މީހުން ރަޖިސްޓްރީވެފައިވާ ހިތާދޫގެ ބިން ހިއްކުމަށް ވަނީ ވައުދުވެވަޑައިގެންފަ އެވެ. އެއާއެކު، ޕިކްނިކް ދާނެ ތަނެއް ވެސް ފަޅުތެރެއިން ތަރައްގީކޮށްދޭނެ ކަމަށް ވިދާޅުވި އެވެ.
ބިން ހިއްކުމަށް ފަހު ހައުސިން ޔުނިޓު އަޅައި، ޒުވާނުން ބޭނުންވާ ގޮތަށް ކޮމިއުނިޓީ ސެންޓަރެއް އަޅައިދޭނެ ކަމަށް ވެސް ރައީސް ވިދާޅުވި އެވެ. މީގެ އިތުރުން އެރަށުގައި ބޯޓުޔާޑަކާއި ފުޓްސަލް ދަނޑާއި ފުޓްބޯޅަ ދަނޑެއް ހެދައިދޭނެ ކަމަށް ރައީސް ވިދާޅުވި އެވެ.
ރައީސް ވިދާޅުވީ އެމްޑީޕީން އިންތިހާބުތަކަށް އަބަދުވެސް ނުކުންނަނީ ސިޔާސަތުތަކާއެކި ކަމަށާއި ބޭނުންވަނީ ރައްޔިތުން ބޭނުންވާ ކަންކަން އޮޅުން ފިލުވައި އެ ކަންތައް ހާސިލްކޮށްދިނުމަށް ކަމަށެވެ.
