އެސްޓީއޯ މިނިވަން ޗެންޕިއަންޝިޕްގެ ފައިނަލް ރައުންޑްގައި މިއަދު ހަވީރު ތ.ތިމަރަފުއްޓާއި އޭދަފުށި ބައްދަލުކުރި މެޗުން އޭދަފުށި ބަލިވުމުން އޭދަފުއްޓަށް ގްރޫޕް ބީ ގެ 2 ވަނަ ލިބިއްޖެއެވެ.
ތިމަރަފުށި ފުޓްބޯޅަ ދަނޑުގައި ކުޅުނު މިމެޗް ތިމަރަފުށިން ކާމިޔާބުކުރީ 0-1 ގެ ނަތީޖާއަކުންނެވެ. ތިމަރަފުށިން ކާމިޔާބުކުރި ހަމައެކަނި ލަނޑު މެޗްގެ 24 ވަނަ މިނިޓްގައި ކާމިޔާބުކޮށްދިނީ އާދަމް
ނާސިހްއެވެ. މި ލަނޑު ނާސިހް ކާމިޔާބުކޮށްދިނީ އެޓީމަށް ލިބުުނު ޕެނަލްޓީއަކުންނެވެ.
މި ނަތީޖާއާއެކު ތިމަރަފުއްޓަށް ވަނީ 9 ޕޮއިންޓާއެކު ގްރޫޕް ބީ ގެ އެއްވަނަ ލިބިފައެވެ. 6 ޕޮއިންޓާއެކު އޭދަފުއްޓަށް ލިބިފައިވަނީ ގްރޫޕްގެ 2 ވަނައެވެ.
މި މުބާރާތުގެ ސެމީ ފައިނަލުގެ ފުރަތަމަ މެޗްގައި ބައްދަލުކުރާނީ ގްރޫޕް އޭ ގެ 1 ވަނަ ޓީމް ކަމަށް ވާ އަދި އެންމެ ފަހުގެ ޗެންޕިއަންޓީމް ސ.ފޭދޫ އާއި ގްރޫޕް ބީ ގެ 2 ވަނަ އޭދަފުއްޓެވެ. މި މެޗް އޮންނާނީ ނޮވެމްބަރ 7 ވާ ހޯމަ ދުވަހު ދ.ކުޑަހުވަދޫ ފުޓްބޯޅަ ދަނޑުގައެވެ.
ސެމީ ފައިނަލުގެ ދެވަނަ މެޗްގައި ބައްދަލުކުރާނީ ގްރޫޕް ބީ ގެ 1 ވަނަ ތިމަރަފުއްޓާއި ގްރޫޕް އޭ 2 ވަނަ ކުޑަހުވަދޫއާއެވެ. މި މެޗް އޮންނާނީ ނޮވެމްބަރ 8 ވާ އަންގާރަ ދުވަހު ތިމަރަފުށި ފުޓްބޯޅަ ދަނޑުގައެވެ.
ސެމީ ފައިނަލްގެ 2 މެޗްވެސް ލައިވް ކުރެވޭތޯ މަސައްކަތް ކުރަމުން އަންނަ ކަމަށް މީގެ ކުރިން އެފް.އޭ.އެމް އިން ވަނީ ބުނެފައެވެ.
މުބާރާތުގެ ފައިނަލް މެޗް އޮންނާނީ ނޮވެމްބަރ 10 ވާ ބުރާސްފަތި ދުވަހު މާލޭގައެވެ.