އުރީދޫ ޑްރޯން ރޭސް 2023 – ރާއްޖޭގެ ފުރަތަމަ ޑްރޯން ރޭސް 23 ޑިސެމްބަރު 2023 ގައި ހުޅުމާލޭ ސެންޓްރަލް ޕާކުގައި ކާމިޔާބުކަމާ އެކު ނިންމާލައިފި އެވެ.
ދެ ކެޓަގަރީއަކަށް ބަހާލައިގެން 12 ހުނަރުވެރި ޕައިލެޓުން ވާދަކުރިއިރު، ސްކައި ވޯކާ ކެޓެގަރީ އިންނާއި ސްކައި އެލީޓް ކެޓެގަރީގައި ވާދަކޮށް އެ ޕައިލެޓުންގެ ހުނަރު ދައްކުވައިދީފައިވެ އެވެ. ސްކައި ވޯކާ ކެޓަގަރީގައި ހަތަރު ހުރަހަކުން 8 ޕައިލެޓުން ހުނަރުވެރިކަމާއެކު ޑްރޯންތަކަށް ދުއްވާފައިވާއިރު، ސްކައި އެލީޓް ކެޓަގަރީން ހަތަރު ބައިވެރިން ނުވަ ހުރަހަކުން ދަތުރުކޮށް އެންމެ ހަލުވި ވަގުތުގެ ތެރޭގައި 2 ލެޕް ނިންމުމަށް ވާދަކޮށްފައިވެއެވެ.
އުރީދޫ މޯލްޑިވްސްގެ ޗީފް ކޮމާޝަލް އޮފިސަރު ހުސައިން ނިޔާޒް ވިދާޅުވީ ރާއްޖޭގައި ފުރަތަމަ ފަހަރަށް ބޭއްވި ޑްރޯން ރޭސް އުރީދޫ ޑްރޯން ރޭސް ކާމިޔާބުކަމާއެކު ކުރިއަށް ގެންދިއުމަކީ އިބޭ ވަރަށް ބޮޑު އުފަލެއް ކަމަށެވެ
“ސްޓެބިސިސް މޯލްޑިވްސްއާ ގުޅިގެން ކުރިއަށް ގެންދިޔަ މި ޑްރޯން ރޭސް ގައި ވާދަކޮށް ވަނަތައް ހޯދި ޕހުނރުވެރި ޕައިލެޓުންނަށް ވަރަށް ހޫނު މަރުޙަބާ ދަންނަވަން. މިއަހަރުގެ ޑްރޯން ރޭހުގެ ކާމިޔާބީގެ މައްޗަށް ބިނާކޮށް، އައު ކަންތައްތަކާއެކު މިއަށްވުރެ ވެސް ފުރިހަމަކަމާއެކު އުރީދޫ ޑްރޯން ރޭސް ކުރިއަށް ގެންދިއުމަށާއި ރާއްޖޭގައި ޑްރޯން ރޭސިންގެ ފުރުސަތުތައް އިތުރަށް ފަހިކޮށްދިނުމަށް އަޅުގަނޑުމެން މަސައްކަތްކުރާނަން.” އުރީދޫ މޯލްޑިވްސްގެ ޗީފް ކޮމާޝަލް އޮފިސަރު ހުސައިން ނިޔާޒް.
ސްކައި އެލީޓް ކެޓަގަރީން ވާދަކުރިފަރާތްތަކުގެ ތެރެއިން 1:00:55 ގެ ތެރޭގައި ރޭސް ނިންމާ އެއްވަނަ އަށް ދާ ފަރާތައް ލިބޭ ޑީޖޭއައި މިނީ 3 ޕްރޯ (ޑީޖޭއައި އާރްސީ) ކާމިޔާބު ކޮށްފައިވަނީ މުހައްމަދު އާލިން ޝާފިއު އެވެ. 1:06:11 އިން ރޭސް ނިންމައި، ހަމްޒާ ވަސީމް ދެވަނަ ހޯދާފާ ވާއިރު، 3ވަނަ ކާމިޔާބުކޮށްފައިވަނީ 1:08:10 މިނެޓުން ރޭސް ނިންމި ހުސައިން އަލޫފް ރިޔާޒެވެ. އެންމެ ދެވަނަ އަށް ދިޔަ ފަރާތަށް 3 މަސް ދުވަހުގެ (1536 ޖީބީ) ޕެކޭޖާއި އެކު އުރީދޫ 5ޖީ އެއާފައިބާ ޑިވައިސް އެއް ލިބިފައިވާއިރު ތިން ވަނަ ހޯދި ފަރާތައް ލިބުނީ 2000 ރުފިޔާގެ މޫލީ ވައުޗަރެކެވެ.
ސްކައި ވޯކާ ކެޓަގަރީގެ އެއްވަނަ އިބްރާހިމް ޝަބީލް 01:11:78 އިން ރޭސް ނިނަމާފައިވާއިރު، ދެވަނަ އަށް ދިޔަ އައްޝަމް ޝަރީފް ހުނަރުވެރިކަމާއެކު 01:25:94 ތެރޭގައި ރޭސް ނިންމާފައިވަނީ އައްޝަމް ޝަރީފެވެ. މި ކެޓެގަރީ އިން އެއްވަނަ ހޯދި ޝަބިލް އަށް ޑީޖޭއައި މިނީ 2 އެސްއީ އެއް ލިބިފައިވާއިރު ދެ ވަނަ ހޯދި ފަރާތައް 3 މަސް ދުވަހުގެ (750 ޖީބީ) ޕެކޭޖާއި އެކު އުރީދޫ 5ޖީ އެއާފައިބާ ޑިވައިސް އެއް ލިބިފައިވެއެވެ. މީގެ އިތުރުން 01:27:36 ރޭސް ނިންމާ ތިން ވަނަ ހޯދި މިފްޒާލް އިބްރާހިމް ފަޒީލަށް 1000 ރުފިޔާގެ މޫލީ ވައުޗަރެއް ލިބިފައިވެއެވެ.
“ރާއްޖޭގެ ރަސްމީ ޑީޖޭއައި އޮތޮރައިޒްޑް ސޭލަރގެ ހައިސިއްޔަތުން، އުރީދޫ މޯލްޑިވްސްއާ ގުޅިގެން ރާއްޖޭގެ ފުރަތަމަ ޑްރޯން ރޭސް ކާމިޔާބުކަމާއެކު ނިންމާލުމަކީ އަޅުގަނޑުމެންނަށް ލިބުނު ވަރަށް ބޮޑު ފަޚުރެއް. އަދި މި އިވެންޓުގެ ކާމިޔާބީގައި ބައިވެރިވި ހުރިހާ ފަރާތްތަކަށާއި އެއްބާރުލުން ދެއްވި ހުރިހާ ފަރާތްތަކަށް ޝުކުރު އަދާކުރަން. އަދި އަޅުގަނޑުމެންގެ އުއްމީދަކީ މިފަދަ އިވެންޓުތަކާއެކު ކުރިއަށް އޮތްތަނުގައި ރާއްޖޭގައި އެފްޕީވީ ރޭސިން އިތުރުވެ ފުޅާވެގެންދިއުން” ސްޓެބިސިސް މޯލްޑިވްސްގެ މެނޭޖިން ޑިރެކްޓަރު އިބްރާހިމް ނިހާދު ވިދާޅުވި އެވެ.
“މިއަދަކީ އާރްސީއަށް ޝައުގުވެރިވާ ފަރާތްތަކުގެ އުފާވެރި ދުވަހެއް. ތަޖުރިބާކާރު އާރްސީ ހޮބީސްޓެއްގެ ހައިސިއްޔަތުން، އަޅުގަނޑަށް ގަބޫލުކުރަނީ މި ހަރަކާތުގެ ސަބަބުން ރޭސިން މުބާރާތްތައް އިތުރުވެ، ރާއްޖޭގައި އާރްސީ އިވެންޓްތަކުގެ ފުރުޞަތު ފުޅާވެގެންދާނެ ކަމަށް. ޑްރޯން ރޭސިންގެ އިތުރުން، މި ހަރަކާތުގެ ސަބަބުން ތަފާތު މޮޑެލް އެއާކްރާފްޓް ހަރަކާތްތަކަށް ދޮރުހުޅުވި، އިންކްލޫސިވް އަދި އެންޓަޓައިނިން އާރްސީ އިވެންޓްތަކަށް މަގު ފަހިވެގެން ދާނެ. މި އިވެންޓް ގެ ކާމިޔާބާއި އުރީދޫ ފަދަ ކުންފުނިތަކުން މިފަދަ ކަންކަން ފަހިކޮށްދިނުމަށް ކުރާ މަސައްކަތުން އާރްސީ ދާއިރާއިން ކުރިއަށް އޮތް ތަނުގައި އިތުރު ފުރުސަތުތައް ފަހިވެގެންދާނެ.” އުރީދޫ ޑްރޯން ރޭސް 2023 ގެ ރޭސް ޑިރެކްޓަރު، އަލީ ނައީމް ވިދާޅުވި އެވެ.
އުރީދޫ ޑްރޯން ރޭސް 2023 ގެ ކާމިޔާބީއާ އެކު، އުރީދޫ މޯލްޑިވްސް އާއި ސްޓެބިސިސް މޯލްޑިވްސް ގުޅިގެން ރާއްޖޭގައި ޑްރޯން ރޭސިން ކުރިއެރުވުމަށް ކުރިއަށްއޮތް ތަނުގައިވެސް މަސައްކަތް ކުރާނެކަމަށް ބުންޏެވެ.
