މިއަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބު މާޗް 17 ވަނަ ދުވަހު ބޭއްވުމަށް އިލެކްޝަންސް ކޮމިޝަނުން ނިންމައިފި އެވެ.
އީސީ އިން މިއަދު ނެރުނު ބަޔާނެއްގައި ބުނީ، ރޯދަ މަސް ތެރޭގައި އިންތިހާބު ބާއްވަން ނިންމާފައި ވަނީ ރޯދައިގެ ފަހުން އިންތިހާބު ބާއްވަން އިދާރީ ބޮޑު ހުރަސްތަކެއް ހުރުމުން ކަމަށެވެ.
އެގޮތުން، އެޑިއުކޭޝަން މިނިސްޓްރީން އިސްލާހުކޮށް އާންމުކޮށްފައިވާ ދިރާސީ ކަލަންޑަރުގައިވާ ގޮތުން، އީދޫ ބަންދަށްފަހު ފެށޭ ހަފްތާއަކީ ސްކޫލުތަކުގެ އިމްތިހާނު އޮންނަ ދުވަސްވަރެވެ. އެހެންވެ، އިންތިހާބަށް ސްކޫލްތައް ލުބުން ދަތިވެ، ވޯޓްލާ މަރުކަޒުތައް ގާއިމްކުރުމަށް ކޮމިޝަނަށް އެކަށީގެންވާ ތަންތަން ނުލިބޭ ކަމަށެވެ.
އަދި، ރޯދަ މަހުގެ ފަހު 10 ދުވަހަކީ ސަރުކާރު ބަންދު ދުވަސްތަކެއްގެ ގޮތުގައި ސަރުކާރުން ކަނޑައަޅާފައި ވާތީ، ސަރުކާރުގެ އެކި ވުޒާރާތަކާއި ދައުލަތުގެ މުއައްސަސާތަކުގެ އެހީތެރިކަމާއެކު ކުރަން ޖެހޭ މަސައްކަތްތައް ކުރުމުގައި ދަތިތަކާ ކުރިމަތިވާނެ ކަމަށް އީސީން ބުނެފައިވެ އެވެ.
މި އަހަރު އޮންނަ 20 ވަނަ މަޖިލީހުގެ އިންތިޚާބުގައި 93 ގޮނޑިއަށް މެންބަރުން އިންތިޚާބު ކުރާނެއެވެ.
