ބ. އަތޮޅު ތައުލީމީ މަރުކަޒުގައި ވަކި މާއްދާއެއްގެ ގޮތުގައި ގައުމިއްޔަތު ކިޔަވައިދޭން މިއަދު ފަށައިފި އެވެ.
ބ. އަތޮޅު ތައުލީމީ މަރުކަޒު ހިމެނޭގޮތަށް އަތޮޅުތަކުގެ 11 ސްކޫލެއްގައި މި މާއްދާ މިދިޔަ އާދީއްތަ ދުވަހު ވަނީ ޕައިލެޓްކޮށްފަ އެވެ. ވަކި މާއްދާއެއްގެ ގޮތުގައި ގައުމިއްޔަތު ފުރަތަމަ ކިޔަވައިދޭން ފަށާނީ ސްކޫލުތަކުގެ ގްރޭޑް ހަތަރެއްގެ ދަރިވަރުންނަށެވެ.
ގައުމިއްޔަތު މާއްދާ ކިޔަވައިދޭން ފެށުމުގެ ގޮތުން ބ. އަތޮޅު ތައުލީމީ މަރުކަޒުގައި މިއަދު ހެނދުނު ވަނީ ހާއްސަ އެސެމްބަލީއެއް ބާއްވައިފަ އެވެ.
އެޑިއުކޭޝަން މިނިސްޓްރީން ބުނީ ގައުމިއްޔަތު މާއްދާގެ ބޭނުމަކީ ދިވެހިވަންތަކަން ހުރި ދިވެހި ގައުމު ދެކެ ލޯބިވާ ގައުމާ މެދު ވިސްނައި ގައުމާމެދު ފަހުރުވެރިވާ ދަރިވަރަކު އުފެއްދުން ކަމަށެވެ.
ގައުމިއްޔަތު ވަކި މާއްދާއެއް ގޮތުގައި ކިޔަވައިދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.
