ރަށްރަށުގައި ހިންގާ ޕްރޮޖެކްޓްތަކަށް ހާއްސަކޮށްގެން ފެނަކައިން ވަޒީފާ ދީފައިވާ ކޮންޓްރެކްޓު މުވައްޒަފުން މި މަހުން ފެށިގެން ދޫކޮށްލަން ނިންމައިފި އެވެ.
ފެނަކައިން ވަނީ، ކުރާނެ މަސައްކަތެއް ނެތް ”ކޮންޓްރެކްޓް ސްޓާފުން“ ގެ މުއްދަތު ހަމަވުމުން، އެފަދަ މުވައްޒަފުންގެ އެއްބަސްވުން އާ ނުކުރާނެ ކަން މިދިޔަ ޑިސެމްބަރު މަހު އަންގާފަ އެވެ.
ފެނަކައިން ބުނީ އެކި ރަށްރަށުގައި އެކުންފުނީގެ އިންޖީނުގެ އާއި އޮފީސް އިމާރާތް ކުރުމުގެ މަޝްރޫއުތަކަށް 731 މުވައްޒަފުން ނަގާފައިވާ ކަމަށެވެ. އެކި ސަބަބުތަކާއި ހެދިގެން އެމަޝްރޫއުތައް މިހާރު ހުއްޓިފައި އޮތަސް އެމުވައްޒަފުންނަށް ބަރާބަރަށް މުސާރަ ދެމުން އަންނަ ކަމަށް ފެނަކައިން ބުނެ އެވެ.
ފެނަކައިން ބުނި ގޮތުގައި އެމުވައްޒަފުންގެ މުސާރައަށް 7 މިލިއަން އާއި 9 މިލިއަން ރުފިޔާ ހަރަދުވެ އެވެ.
ފެނަކައިން ނިންމާފައިވަނީ، ޕްރޮޖެކްޓްތަކަށް ކޮންޓްރެކްޓް މުވައްޒަފުން ނެގުމުގެ ބަދަލުގައި އެ މަސައްކަތްތަކަށް ބަޔަކު ހޯދައިގެން ކުރާށެވެ.
ފެނަކައިން ބުނީ މަޝްރޫއުތައް ހިންގަން ބޭނުންވާ ވަސީލަތްތައް އެ ކުންފުނީގައި ނެތް ކަމަށެވެ. އެހެންވެ، މަޝްރޫއުތައް ކުރިއަށްގެންދިޔައީ މެޝިންތައް ކުއްޔަށް ނަގައިގެންނެވެ. އެކަމަކު، އެ ސާމާނުގެ ކުއްޔަށް ފައިސާ ނުދީގެން ބައެއް ކުންފުނިތަކުން މުޒާހަރާ ވެސް ކޮށްފައިވެ އެވެ.
