މިއަހަރުގެ އޯލެވެލް އިމްތިހާނުން ބ. ކިހާދޫ ސްކޫލުން ތާރީޚީ ބޮޑު ކާމިޔާބީއެއް ހޯދައިފި އެވެ.
މިދިޔަ މެއި/ޖޫން މަހު ބޭއްވި އޯލެވެލް އިމްތިހާނުގައި ކިހާދޫ ސްކޫލުގެ 12 ދަރިވަރުން ބައިވެރިވި އެވެ. އޭގެ ތެރެއިން ދިވެއްސާއި އިސްލާމް އާއި ބައޮލޮޖީ އަދި ކެމިސްޓްރީން 92 ޕަސެންޓް ކުދިން ވަނީ ފާސްވެފަ އެވެ. އޭގެ އިތުރުން އެ ސްކޫލުގެ ހަތަރު ދަރިވަރަކު ވަނީ ގައުމީ ގަދަ 10 ގައި ހިމެނިފަ އެވެ.
ކިހާދޫ ސްކޫލު ކުދިން ހޯދި ބޮޑު ކާމިޔާބީއާ ގުޅޭ ގޮތުން، އެ ސްކޫލުގެ ޕްރިންސިޕަލް މުހައްމަދު ޒުބައިރު ވިދާޅުވީ، އިމްތިހާނުހެދި 12 ދަރިވަރުންގެ ތެރެއިން ހަތަރު ދަރިވަރުން ގައުމީ ގަދަ 10 ގައި ހިމެނުމަކީ ވަރަށް ބޮޑު ކާމިޔާބީއެއް ކަމަށެވެ.
މީގެ އިތުރުން މިއަހަރުގެ ސާނަވީ އިމްތިހާނުން ބ. އަތޮޅުގެ ސްކޫލްތަކުން އެންމެ ރަނގަޅު ނަތީޖާ ހޯދާފައިވަނީ ވެސް ކިހާދޫ ސްކޫލުގެ ދަރިވަރެކެވެ. ޒުބައިރު ވިދާޅުވި ގޮތުގައި މިއީ ވެސް ވަރަށް ބޮޑު، ތާރީޚީ ކާމިޔާބީ އެކެވެ.
“މިއީ މުޅި ކިހާދޫ ފަޚްރުވެރިވާ ނަތީޖާ އެއް،”
އިމްތިހާނުގައި ބައިވެރިވި ދަރިވަރުންގެ ތެރެއިން އެންމެ ރަނގަޅު ނަތީޖާއެއް ހޯދީ ޝައިޙާ މުޙައްމަދު ނާފިޒެވެ. އޭނާ ބައިވެރިވި އަށް މާއްދާގެ ތެރެއިން ދިވެހި ފިޔަވައި ހުރިހާ މާއްދާއަކުން އޭ ސްޓާ ހޯދައި ގަދަ 10 ގެ ދެ ވަނައިގައި ވަނީ ހިމެނިފަ އެވެ. ދިވެހިން ލިބުނީ އޭ އެކެވެ.
އަމާން ހުސައިން ރަޝީދު އާއި ފާތުމަތު ޝައިފާ މުހައްމަދު ސިޔާމް ވަނީ ގަދަ ދިހައެއްގެ 8 ވަނައިގައި އަދި ފާތުމަތު މައިޝާ ވަނީ ދިހަ ވަނައިގައި ހިމެނިފަ އެވެ.
ޕްރީ ސްކޫލުން ފެށިގެން ގުރޭޑް 10އާ ހަމައަށް ކިޔަވައިދޭ ކިހާދޫ ސްކޫލުގައި 150 އެއްހާ ދަރިވަރުން ތައުލީމް ހާސިލުކުރަމުން ގެންދެ އެވެ.
