ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަދި މަޝްހޫރު ވިޔަފާރިވެރިޔާ އަހްމަދު ސިޔާމް މުހައްމަދު (ސަން ސިޔާމް)ގެ ފަރާތުން ބ. ކަމަދޫ ރައްޔިތުންގެ ބޭސްފަރުވާއަށް އެހީތެރިވުމަށް ނިންމާފައިވާ ކަމަށް އެ ރަށު ކައުންސިލުން މިއަދު ހާމަކޮށްފިއެވެ.
ކަމަދޫ ކައުންސިލުން ބުނި ގޮތުގައި މި އެހީތެރިކަން ފޯރުކޮށްދޭނީ ސިޔާމްގެ ‘ސަންސިޔާމް ކެއާ’ ފައުންޑޭޝަނުގެ ފަރާތުންނެވެ. އަދި މި އެހީ ދޭނީ ވަކި އުސޫލެއްގެ ދަށުންނެވެ. މި އެހީގެ ދަށުން ރާއްޖެއިންނާއި ރާއްޖެއިން ބޭރުން ކުރާ ބޭސްފަރުވާއަށް ވެސް އެހީތެރިކަން ލިބޭނެ ކަމަށް ކައުންސިލުން ނެރުނު އިޢުލާނުގައި ބަޔާންކޮށްފައިވެއެވެ.
މި އެހީ ބޭނުންވާ ފަރާތްތަކުން އެކަމަށް ޚާއްޞަ ފޯމެއް ކައުންސިލަށް ހުށަހެޅުމުން، އެހީ ހަމަޖައްސައިދިނުމަށް މަސައްކަތް ކޮށްދޭނެ ކަމަށް ވެސް އިޢުލާނުގައި ބުނެފައިވެއެވެ.
އަހްމަދު ސިޔާމްގެ ފައުންޑޭޝަނުން މީގެ ކުރިން ވެސް ވަނީ ގިނަ ބަޔަކަށް މިފަދަ ކަންކަމުގައި އެހީތެރިކަން ފޯރުކޮށްދީފައެވެ. މި އެހީތެރިކަމަކީ ކަމަދޫ ރައްޔިތުންނަށް ބޭސްފަރުވާގެ ޚަރަދުތަކަށް ލުޔެއް ލިބިގެންދާނެ ކަމެއް ކަމަށް ބެލެވެއެވެ.
