ބ. އޭދަފުށީ ކައުންސިލުން އިންތިޒާމުކޮށްގެން އަންނަ މަހު ބޭއްވުމަށް ހަމަޖެހިފައިވާ “އޭދަފުށި ކަޕް” ފުޓްބޯޅަ މުބާރާތަށް ރަށުން ބޭރުގެ ދެ ކުޅުންތެރިން ގެނައުމަށް 25,000 ރުފިޔާގެ އެހީއެއް ދިނުމަށް ކައުންސިލުން ނިންމައިފިއެވެ.
މި އެހީ ދިނުމަށް ނިންމާފައިވަނީ މުބާރާތުގައި ބައިވެރިވާ ވެލާ ސްޕޯޓްސް ކްލަބުން ހުށަހެޅި ޕްރޮޕޯސަލަށް ރިޢާޔަތްކޮށް، ކައުންސިލުގެ އާންމު ޖަލްސާއިންނެވެ. ކައުންސިލުން ބުނި ގޮތުގައި މި ނިންމުން ނިންމާފައިވަނީ އެހީ ދިނުމާބެހޭ އުސޫލާއި މާލިއްޔަތު ޤާނޫނާއި ގަވާއިދާ އެއްގޮތްވާ ގޮތުގެ މަތިންނެވެ.
މިދިޔަ އަހަރުވެސް އޭދަފުށި ކަޕުގައި ބައިވެރިވި ބައެއް ޓީމުތަކަށް ރަށުން ބޭރުން ކުޅުންތެރިން ގެނައުމަށް ކައުންސިލުން ވަނީ މާލީ އެހީތެރިކަން ފޯރުކޮށްދީފައެވެ.
އޭދަފުށި ކަޕަކީ މިރަށުގެ ފުޓްބޯޅަ ކުޅުމުގެ ރޫހު އާލާކޮށް، ޒުވާނުންނަށް ކުޅިވަރުގެ ފުރުސަތު ފަހިކޮށްދިނުމުގެ މަޤްޞަދުގައި ކައުންސިލުން މިދިޔަ އަހަރުން ފެށިގެން ބާއްވަމުން އަންނަ މުބާރާތެކެވެ.
