ކްލަބް ކޮމްބިނޭޝަން (ސީސީ) އިން އިންތިޒާމުކޮށްގެން ބ. އޭދަފުށީގައި ބޭއްވި އިންޓަ ރިސޯޓް ކްރިކެޓް މުބާރާތުގެ ޗެމްޕިއަންކަން އަމިއްލަ މޯލްޑިވްސް އިން ހޯދައިފި އެވެ.
ފައިނަލުގައި އަމިއްލަ މޯލްޑިވްސް ބައްދަލުކުރީ ފިނޮޅު ރިސޯޓާ އެވެ.
އޭދަފުށީ ވެލި ދަނޑުގައި އިއްޔެ ހަވީރު ކުޅުނު މި މުބާރާތުގެ ފައިނަލު މެޗުގައި ފުރަތަމަ ކުޅެން އަރައި، ފިނޮޅު ރިސޯޓަށް އަށް އޯވަރުގެ ތެރޭގައި، ހަ ވިކެޓަށް ވަނީ 131 ލަނޑު ހަދައިފަ އެވެ. ޖަވާބުގައި، އަމިއްލަ މޯލްޑިވްސް އިން ކުޅެން އަރައި 7.5 އޯވަރުގެ ތެރޭ ތިން ވިކެޓަށް ވަނީ 132 ލަނޑު ހަދައިފަ އެވެ. މެޗުގެ މޮޅު ކުޅުންތެރިއަކީ، އަމިއްލަ މޯލްޑިވްސްގެ ރޯޝަން އެވެ.
މި މުބާރާތުގެ އެންމެ މޮޅު ކުޅުންތެރިޔާ އަދި ބެސްޓް ބެޓްސްމެން އަކަށް ފިނޮޅު ރިސޯޓުގެ ޔަސަންތާ ހޮވުނުއިރު، ބެސްޓް ފީލްޑަރަކަށް ހޮވުނީ ފިނޮޅު ރިސޯޓްގެ ޕްރިޔަންތާ އެވެ. ބެސްޓް ބޯލަރ އަކަށް ހޮވުނީ އަމިއްލަ މޯލްޑިވްސްގެ ލާހިރު އެވެ.
މި މުބާރާތަކީ އަތޮޅުގައި ރިސޯޓްތަކުގެ މެދުގައި ބޭއްވޭ ހަމައެކަނި ކްރިކެޓް މުބާރާތެވެ. އެގޮތުން މިއީ ސީސީން ބޭއްވި ދެވަނަ މުބާރާތެވެ.
