ގައުމީ އެކި ވައްތަރުގެ ހެދުމުގައި ނަލަ ހެދިލައިގެން ތިބިއިރު ވަރަށް ލޯތްބެވެ. ސްކޫލުތަކުގައި، އެހެން އަހަރުތަކެކޭ ވެސް އެއްގޮތަށް ގައުމީ ދުވަސް ފާހަގަކުރުމަށް ދަރިވަރުންނާއި މުވައްޒަފުން ދިޔައީ ގައުމީ އެކި ހެދުންތަކުގަ އެވެ. އަންހެން ކުދިން ދިގުހެދުމާއި ކުރު ހެދުމާއި ކަނޑިކިއާ އަދި ވެސް އެކި ވައްތަރުގެ ހެދުން ލައިގެން ތިބިއިރު ފިރިހެން ކުދިން ފެނިގެން ގިނައިން ދިޔައީ މުންޑާއި ފޭއްޔާއި ޓީޝާޓުގަ އެވެ.
ގައުމީ ދުވަހަކީ މާދަމާ ކަމަށް ވިޔަސް ރާއްޖޭގެ ގިނަ ސްކޫލުތަކުގައި މިއަދު ވަނީ ގައުމީދުވަސް ފާހަގަކުރުމުގެ ހަރަކާތްތައް ހިންގާފައެވެ.
އެގޮތުން ބ. އަތޮޅުގެ ސްކޫލުތަކުގައި ވެސް ގައުމީދުވަސް މިއަދު ފާހަގަކޮށްފައިވެ އެވެ.
ސްކޫލުގައި ކުރިއަށްގެންދިޔަ ހަރަކާތްތަކުގެ ތެރޭގައި ހާއްސަ އެސެމްބްލީ އާއި ގައުމީދުވަހާ ގުޅޭގޮތުން ދަރިވަރުން ވާހަކަދެއްކުމާއި ރައިވަރާއި ބަނދި ކިޔުން ހިމެނެ އެވެ،
މީގެ އިތުރުން ގައުމިއްޔަތާ ގުޅޭ އެކި މައުލޫމާތު ލިބޭ ގޮތަށް ސްކޫލުގެ އެކި ދިމާލުގައި ލިއުންތައް ހަރުކޮށް، ތަފާތު ސްޓޯލްތައްވެސް ބައެއް ސްކޫލުތަކުގައި ހަދާފައި ހުއްޓެވެ.
ބ. އަތޮޅު ތައުލީމީ މަރުކަޒުން ބުނިގޮތުގައި މި ހަރަކާތްތަކުގެ މަޤްޞަދަކީ ދަރިވަރުންގެ މެދުގައި ގައުމިއްޔަތުގެ ރޫޙު އާލާކޮށް، ދިވެހި ސަގާފަތާއި އާދަކާދަތައް ދިރުވައި އާލާކުރުމެވެ. މި ފަދަ ހަރަކާތްތަކުން ދަރިވަރުންނަށް ދިވެހި ތާރީޚާއި ސަގާފަތުގެ މުހިންމުކަން އިތުރަށް އޮޅުންފިލައި، ގައުމީ ލޯބި އިތުރުވެގެންދާނެ ކަމަށް ސްކޫލުތަކުން އުންމީދުކުރެއެވެ.
ގައުމީ ދުވަހަކީ ކޮންމެ އަހަރެއްގެ ރަބީޢުލްއައްވަލު މަހުގެ ފުރަތަމަ ދުވަހު ފާހަގަކުރާ ދުވަހެކެވެ. މި ދުވަހުގެ ތާރީޚީ މުހިންމުކަން ފެށިގެން އަންނަނީ ޕޯޗުގީޒުންގެ އަޅުވެތިކަމުން ދިވެހިރާއްޖެ މިނިވަންކުރި ހާދިސާއާ ގުޅިގެންނެވެ. ޕޯޗުގީޒުން ދިވެހިރާއްޖެ އަޅުވެތިކޮށްގެން 15 އަހަރެއްހާ ދުވަހު ވެރިކަން ކުރަމުން ދަނިކޮށް، ހއ. އުތީމު މަޝްހޫރު ބޮޑުތަކުރުފާނު މާލެ އަރުއްވައި، ޕޯޗުގީޒުންނާ ހަނގުރާމަކުރައްވައި، އެ ބައިމީހުންގެ އަނިޔާވެރި ވެރިކަން ނިމުމަކަށް ގެނެސްދެއްވީ ރަބީޢުލްއައްވަލު މަހުގެ ފުރަތަމަ ދުވަހުގައެވެ.
