ރާއްޖޭގެ ހަ ސްކޫލެއްގެ 16 ދަރިވަރުން އިޔާދަކުރަނިވި ހަކަތައިގެ ތަޖުރިބާ ދަތުރެއްގައި އިންޑިޔާއަށް އިއްޔެ ފުރައިފިއެވެ. މި ދަތުރަކީ ވޯލްޑް ބޭންކުގެ އެހީގައި ތިމާވެއްޓާބެހޭ މިނިސްޓްރީން ހިންގާ އެސްޕަޔާ ޕްރޮޖެކްޓުގެ ދަށުން ކުރިއަށްގެންދާ ދަތުރެކެވެ.
ނިއު ދިއްލީއަށް ކުރާ މި ދަތުރުގައި ބައިވެރިވަނީ ހދ. ކުޅުދުއްފުށި، ބ. އޭދަފުށި، ޅ. ހިންނަވަރު، ގދ. ތިނަދޫ، އައްޑޫ އަދި ފުވައްމުލަކުގައި މަތީ ސާނަވީއަށް ކިޔަވާ ދަރިވަރުންނެވެ. މި ދަތުރުގައި އޭދަފުށީން ބައިވެރިވަނީ ބ. އަތޮޅު ތައުލީމީ މަރުކަޒުގެ ގްރޭޑް 12 ގައި ކިޔަވަމުން އަންނަ އާމިނަތު އިމްނާ ޝަހީމް އެވެ.
މިއީ އެސްޕަޔާ ޕްރޮޖެކްޓުގެ ތިންވަނަ ފިޔަވަހީގެ ދަށުން މަސައްކަތްކުރާ ރަށްތަކުން ހޮވާފައިވާ ދަރިވަރުންނެވެ.
ތިމާވެއްޓާބެހޭ މިނިސްޓްރީން ބުނެފައިވަނީ މި ދަތުރުގެ މައިގަނޑު މަޤްޞަދަކީ ހަކަތައިގެ ދާއިރާއަށް ދަރިވަރުން ޝައުޤުވެރިކުރުވައި، އެ ދާއިރާގެ ފުރުޞަތުތަކާ ގުޅޭގޮތުން ހޭލުންތެރިކުރުވުމެވެ. ޚާއްޞަކޮށް އަންހެނުން މި ދާއިރާގައި މަސައްކަތްކުރުމަށް ބާރުއެޅުމަކީވެސް މި ދަތުރުގެ އަމާޒެއް ކަމަށް ބުނެފައިވެއެވެ. އެގޮތުން 16 ދަރިވަރުންގެ ތެރެއިން 10 ދަރިވަރުންނަކީ އަންހެން ދަރިވަރުންނެވެ.
މި ދަތުރު ރާވާފައިވަނީ އެޑިޔުކޭޝަން މިނިސްޓްރީއާއި އިންޑިޔާގެ ޓާޓާ ޕަވާ ޑީޑީއެލްއާ ގުޅިގެންނެވެ. ދަތުރުގައި ހަކަތައިގެ ދާއިރާއާ ގުޅޭ އިންޓްރޮޑަކްޓަރީ ކްލާސްރޫމް ސެޝަންތަކާއި، ޓާޓާ ޕަވާގެ އެކި ކަހަލަ ފަންނީ ފެސިލިޓީތަކަށް ޒިޔާރަތްކޮށް، އެ ތަންތަނުގައި މަސައްކަތްކުރާ ގޮތް ބަލައިލުމުގެ ފުރުޞަތު ދަރިވަރުންނަށް ލިބޭނެއެވެ. މީގެ އިތުރުން ހަކަތައިގެ ދާއިރާއާ ގުޅޭ 13 މާއްދާއެއް ދަރިވަރުން ކިޔަވާނެއެވެ.
ދަރިވަރުން ޒިޔާރަތްކުރާނެ ތަންތަނުގެ ތެރޭގައި ސްމާޓް ގްރިޑް ލެބް، ސްކާޑާ ކޮންޓްރޯލް ސެންޓަރު، ޓްރާންސްފޯމަރު ވޯކްޝޮޕް، އިޔާދަކުރަނިވި ހަކަތައިގެ އެހެނިހެން ސައިޓުތައް އަދި އިލެކްޓްރިކް ވެހިކަލް ޗާޖިން ސައިޓުތައް ހިމެނެއެވެ. އަދި ނޮއިޑާގައި ހުންނަ ޝިވް ނާދަރް ޔުނިވަރސިޓީ އޮފް އެމިނެންސްގެ ދަޢުވަތަކަށް ދެ ދުވަހަށް އެ ޔުނިވަރސިޓީގެ ކެމްޕަހަށް ޒިޔާރަތްކޮށް، އެތަނުގެ ޕްރޮގްރާމްތަކާއި ވަސީލަތްތައް ބަލައިލުމަށްވެސް ހަމަޖެހިފައިވެއެވެ.
މީގެ އިތުރުން، ނިއު ދިއްލީގެ ބައެއް ތަންތަނަށާއި އާގްރާގެ ތާޖު މަހަލްއަށް ދަރިވަރުން ޒިޔާރަތްކުރުމަށްވެސް ވަނީ ހަމަޖެހިފައެވެ.
މި ދަތުރަކީ ދިވެހި ދަރިވަރުންނަށް އިޔާދަކުރަނިވި ހަކަތައިގެ ދާއިރާއާ ބެހޭ ޢަމަލީ ތަޖުރިބާ ހޯދައި، މުސްތަޤުބަލުގައި މި ދާއިރާއިން ކެރިއަރެއް އިޚްތިޔާރުކުރުމަށް ހިތްވަރު ލިބިދޭނެ ފުރުޞަތެއް ކަމަށް ބެލެވެއެވެ.
