ކ. ގުރައިދޫގެ މަގުތައް ޒީނަތްތެރިކުރުމުގެ މަޤްޞަދުގައި ގަސް އިންދުމުގެ މުބާރާތެއް ބޭއްވުމަށް އެ ރަށު ކައުންސިލުން އިޢުލާން ކޮށްފިއެވެ.
“ގުރައިދޫގެ މަގުތަކުގައި ގަސްއިންދާ ޒީނަތްތެރި ކުރުމުގެ މުބާރާތް” މި ނަމުގައި ބާއްވާ މި މުބާރާތް ކުރިއަށް ގެންދިއުމަށް ހަމަޖެހިފައިވަނީ މި މަހުގެ އެއްވަނަ ދުވަހުން ފެށިގެން 1 އަހަރު ދުވަހުގެ މުއްދަތަށެވެ.
އެރަށު ކައުންސިލުން ބުނި ގޮތުގައި މި މުބާރާތް ކުރިއަށްދާނީ ރަށުގެ 14 ސަރަހައްދަކަށް ބަހާލައިގެންނެވެ. މުބާރާތުގެ ނަތީޖާ ނެރުމަށް ހަމަޖެހިފައިވަނީ ކަމުގެ ތަޖުރިބާ ހުރި ރަށުން ބޭރު ފަރާތެއް ނުވަތަ ފަރާތްތަކެއްގެ އެހީގައެވެ. މި ފަރާތްތަކުން ކަނޑައެޅިފައިވާ މިންގަނޑުތަކަށް ބެލުމަށްފަހު 1 ވަނަ، 2 ވަނަ އަދި 3 ވަނަ ސަރަހައްދު ހޮވާނެއެވެ.
މުބާރާތުގައި އެންމެ މޮޅު ތިން ސަރަހައްދަށް ޚާއްޞަ އިނާމުތަކެއް ކަނޑައަޅާފައިވެއެވެ. އެގޮތުން އެއް ވަނަ ސަރަހައްދަށް 30,000 ރުފިޔާ، ދެ ވަނަ ސަރަހައްދަށް 20,000 ރުފިޔާ އަދި ތިން ވަނަ ސަރަހައްދަށް 10,000 ރުފިޔާ ދިނުމަށް ހަމަޖެހިފައިވެއެވެ.
ކައުންސިލުން އިތުރަށް މަޢުލޫމާތު ދެމުން ބުނެފައިވަނީ މުބާރާތަށް މިއަދުން ފެށިގެން 15 ދުވަހުގެ ތެރޭގައި މުބާރާތުގައި ބައިވެރިވުމަށް ކޮންމެ ސަރަހައްދަކުންވެސް ދެވިފައިވާ ލިންކު މެދުވެރިކޮށް ރަޖިސްޓަރީ ވާންވާނެ ކަމަށެވެ. އަދި ރަޖިސްޓްރީވާއިރު ސަރަހައްދަށް ކިޔާނެ ނަމަކާއި ލީޑަރެއް ކަނޑައަޅަންވާނެއެވެ.
އެގޮތުން ކޮންމެ ސަރަހައްދަކުންވެސް ކަނޑައަޅާ ލީޑަރަކީ ކައުންސިލުން މުޢާމަލާތު ކުރާނެ މައި ފަރާތް ކަމުގައިވާތީ، އެ ލީޑަރަކީ ފަސޭހަކަމާއެކު މުޢާމަލާތު ކުރެވޭނެ ފަރާތަކަށް ވާންޖެހޭނެ ކަމަށް ވެސް އެރަށު ކައުންސިލުން ބުންޏެވެ.
މި މުބާރާތަކީ ގުރައިދޫގެ މަގުތައް ޒީނަތްތެރިކޮށް، ރަށުގެ ވެށި އިތުރަށް ފެހިކުރުމަށް އެޅޭ މުހިންމު ފިޔަވަޅެއްކަން ފާހަގަކުރެވެ އެވެ.
